تاند ( دوشنبه د زمري ـ اسد ۱۲مه) د کرکټ اړوند کریمانفو وېبپاڼې راپور ورکړی چې د افغانستان د کرکټ ملي لوبډلې ستوري راشد خان له ایرلنډ سره د افغان لوبډلې د راتلونکو سیالیو په تړاو ویلي چې ملي لوبې ورته تر هر څه لومړیتوب لري.
راشد خان دغه څرګندونې د ۱۰۰ بالیز لیګ د پرېښودو او د ملي لوبډلې سره د یوځای کېدو لپاره ایرلنډ ته د روانېدو پر مهال کړې دي. افغانستان به له ایرلنډ سره د اګست له ۵مې تر ۱۴مې پورې پنځه یو ورځنۍ سیالۍ ترسره کړي.
راشد خان تر دې وړاندې د «MI London» لوبډلې لپاره په ۱۰۰ بالیز لیګ کې لوبېده، خو له ملي لوبډلې سره د یوځای کېدو لپاره یې دغه سیالۍ پرېښودې.
نوموړي په خپله وروستۍ لوبه کې د «Manchester Super Giants» پر وړاندې په ۲۰ توپونو کې ۱۷ منډې ورکړې او پنځه لوبغاړي یې وسوځول، چې دا یې په ۱۰۰ بالیز لیګ کې د پنځو وېکټو ځانګړې لاسته راوړنه وه.
د هغه لوبډلې هم دغه لوبه په ۴۵ منډو وګټله او راشد د لوبې غوره لوبغاړی وټاکل شو.
راشد خان یوازې د افغانستان او نړۍ له مهمو لوبغاړو څخه شمېرل کېږي، او د نړۍ په بېلابېلو شلاوریزو لیګونو کې هم د پام وړ تجربه لري.
کرکټ پوهان وایي، سره له دې چې راشدخان ته د نړۍ په مشهورو لیګونو کې د لوبېدو فرصتونه شته، د ملي لوبډلې لپاره د لوبېدو په اړه یې تل ځانګړې ژمنتیا ښودلې ده.
دوی وایي، د راشد خان دا پرېکړه چې شخصي او نړیوال لیګ پرېږدي او د افغانستان د ملي لوبډلې ترڅنګ ودرېږي، د ملي ژمنتیا ښه بېلګه ده.