تاند (سې شنبه، د چنګاښ/ سرطان ۳۰ مه) انډي برنهم (Andy Burnham) د برېتانیا د کارګر ګوند (Labour Party) مخکښ سیاستوال دی، چې له اوږدې مودې راهیسې یې په ملي سیاست کې مهم رول لوبولی دی. نوموړی تر دې وړاندې د انګلستان د منچسټر ښاروال هم پاتې شوی او اوس د کیر سټارمر ځای ناستی او د بریتانیا نوی صدراعظم ټاکل شوی دی.
برنهم په ۱۹۷۰ کال کې د انګلستان په مرسيسایډ کې زېږېدلی او په لیورپول پوهنتون کې یې زده کړې کړې دي. هغه په ۲۰۰۱ کال کې په لومړي ځل د پارلمان غړی شو او وروسته یې د روغتیا، کلتور او نورو برخو د وزیر په توګه هم دنده ترسره کړه.
هغه د کارګر ګوند د مشرۍ لپاره څو ځله سیالي وکړه، خو بریالی نه شو. وروسته په ۲۰۱۷ کال کې د لوی منچسټر ښاروال وټاکل شو او د سیمهییزو خدماتو، عامه ترانسپورت او روغتیايي پالیسیو له امله یې شهرت ترلاسه کړ.
په ۲۰۲۶ کال کې، وروسته له دې چې کیر سټارمر له واکه لرې شو، انډي برنهم د کارګر ګوند مشر او د بریتانیا صدراعظم شو. هغه په تېرو لسو کلونو کې د بریتانیا اووم صدراعظم دی.
د برنهم مهمې ژمنې او پالیسۍ:
- د عامه روغتیايي خدماتو (NHS) پیاوړتیا.
- د ژوند د لګښتونو د کمولو لپاره اقتصادي اصلاحات.
- د کورونو د بیو او کرایو د ستونزې حل.
- د سیمو ترمنځ د اقتصادي نابرابرۍ کمول.
- د عامه ترانسپورت او بنسټیزو خدماتو پراختیا.
د هغه پلویان نوموړی د کارګرانو او عادي خلکو غږ بولي، خو منتقدان یې وایي چې د اقتصادي ژمنو عملي کول به اسانه نه وي.