تاند (یکشنبه، د چنګاښ/ سرطان ۲۸ مه) له چین څخه افغانستان ته د سوداګري توکو چوپه په لومړي ځل د ایران له لارې د افغانستان هرات ولایت ته راورسېده.
ایراني چارواکي وایي چې دا مال په لاره کې د منځنۍ اسیا په هیوادونو کې له ښکته او بیا بارېدو پرته په مستقیم ډول افغانستان ته رسول شوی دی.
د ایران او افغانستان د رېللارو ريیس مصطفی رضايي ویلي چې دا بار ۵۰۰ ټنه MDF تختې دي چې له بیجینګ څخه بار شوې وې.
د هغه په وینا، رېلګاډی له ترکمنستان څخه ایران ته داخل شو او وروسته د خواف – هرات په رېللارې د روزنک تمځای ته ورسېد.
رضايي زیاته کړه چې دا د ایران له لارې له بیجینګ څخه هرات ته د توکو لومړنی مستقیم رېلي انتقال دی، او بار د ټول سفر په ترڅ کې نه دی ښکته او بیا بار شوی.
هغه وویل، د سمندري او رېلي ګډ ترانسپورټ کارولو له امله د پخوانیو لارو پرتله د بار لېږد وخت او لګښت دواړه کم شوي دي.
د ایران او افغانستان د رېللارو ريیس ټینګار وکړ چې د دې رېلي خدمت پیل ښيي چې د خواف – هرات د رېلګاډي کرښه د سوداګریزو او ترانزیټي فعالیتونو د پراختیا نوي پړاو ته داخله شوې ده.
هغه زیاته کړه، که له دې لارې د تېرېدونکو توکو اندازه زیاته شي، نو ایران به د ختیځې اسیا، منځنۍ اسیا او افغانستان ترمنځ د نښلونکې ترانزیټي لارې په توګه خپل موقعیت نور هم پیاوړی کړي.
د خواف – هرات د رېللارې جوړولو چارې په ۱۳۸۶ لمریز کال کې پیل شوې او د دې پروژې لومړۍ درې برخې، چې شاوخوا ۱۴۰ کیلومتره اوږدوالی لري، بشپړې او پرانیستل شوې دي.
د دې رېللارې اوږدوالی شاوخوا ۲۲۵ کیلومتره دی او په څلورو برخو کې طرحه شوې ده. ټاکل شوې چې څلورمه برخه د روزنک تمځای د هرات ښار له مرکز سره ونښلوي.