تاند (یکشنبه، د چنګاښ/ سرطان ۲۸ مه) دد فوټبال د ۲۰۲۶ کال نړیوال جام وروستي پړاو ته رسېدلی او نن شپه به د تېر پړاو اتله لوبډله، ارجنټاین او د ۲۰۱۰ کال نړیواله اتله هسپانیا د نړیوال جام د اتلولۍ لپاره په پایلوبه کې سره مخامخ شي.
دا سیالي چې د امریکا نیویارک ته څېرمه په نیوجرسي کې ترسره کېږي، د افغانستان پر وخت به د شپې ۱۱:۳۰ بجې پیل شي، او د نړۍ د فوټبال د میلیونونو مینهوالو پام ورته اوښتی دی.
تر پایلوبې مخکې د سپورتي احصایو د شننې لپاره د اوپټا (Opta) د مصنوعي ځیرکتیا سوپر کمپیوټر خپله وړاندوینه خپره کړې، چې پکې هسپانیا د اتلولۍ اصلي ګټونکې بلل شوې ده.
د راپور له مخې، د اوپټا د مصنوعي ځیرکتیا ماډل د ۲۵ زره ډیجیټلي سمولیشنونو پر بنسټ اټکل کړی چې:
- د هسپانیا د بري چانس ۵۹.۶ سلنه دی.
- د ارجنټاین د بري چانس ۴۰.۴ سلنه دی.
د سوپر کمپیوټر د اټکل له مخې، هسپانیا ۴۵ سلنه احتمال لري چې لوبه په ټاکلو ۹۰ دقیقو کې وګټي، په داسې حال کې چې د لوبې اضافي وخت ته د لویې د غځېدو احتمال ۲۹ سلنه ښودل شوی دی.
له بلې خوا، ارجنټاین یوازې ۲۶ سلنه چانس لري چې لوبه په عادي وخت کې وګټي.
هسپانیا په خپل تاریخ کې دوهم ځل د نړیوال جام پایلوبې ته رسېدلې، په داسې حال کې چې ارجنټاین اووم ځل د نړیوال جام په پایلوبه کې لوبېږي.
کارپوهان وايي، که څه هم د مصنوعي ځیرکتیا ماډل هسپانیا ته لږه برتري ورکړې، خو د فوټبال په ډګر کې وروستۍ پرېکړه د لوبغاړو پر کړنې، د روزونکو پر تګلارې او د لوبې پر جریان پورې تړلې وي.
ې د اوپټا مصنوعي ځیرکتیا سوپر کمپیوټر د سپورتي احصایو او معلوماتو پر بنسټ د لوبو د احتمالي پایلو وړاندوینه کوي، خو دا وړاندوینې خامخا پوره دقیقې نه وي.