کندهار: د میرویس نیکه پوهنتون له لوري د «د استعمار پر وړاندې د میرویس نیکه مبارزه او د هوتکي پاڅون ۳۲۰مه کلیزه» تر سرلیک لاندې یو ورځنی علمي او څېړنیز سیمینار جوړ شو.
په دې سیمینار کې د هېواد ذ بېلابېلو ولایتونو څېړونکو، لیکوالانو، ادیبانو، فرهنګپالو، د پوهنتون استادانو او یو شمېر ځوانانو ګډون کړی وو.
د حقوقو او سیاسي علومو پوهنځي رئیس، فرهاد داوري، د سیمینار د جوړېدو موخې تشریح کړې او ویې ویل چې د میرویس نیکه سیاسي تدبیر، عقلانیت، ولسي انسجام او مشرتابه هغه موضوعات دي چې باید پرې علمي څېړنې وشي او نوی نسل ورسره اشنا شي.
لیکوال او څېړونکي محمدمعصوم هوتک په خپلو خبرو کې د میرویس نیکه پاڅون یو ولسي حرکت وباله او ویې ویل چې دغه پاڅون د بهرني تسلط د پای ته رسولو سبب شو. هغه ټینګار وکړ چې دا ډول علمي سیمینارونه د تاریخي څېړنو او علمي بحثونو د پیاوړتیا لپاره مهم دي.
د کندهار د اطلاعاتو او فرهنګ رئیس د سیمینار د جوړېدو هرکلی وکړ او د تاریخ د مطالعې پر اهمیت یې ټینګار وکړ. هغه وویل، افغانانو په تاریخ کې د لویو امپراتوریو پر وړاندې بریاوې خپلې کړې، خو د هغو د ساتنې په برخه کې له ننګونو سره مخامخ شوي او اړتیا ده چې له تاریخه عبرت واخیستل شي.
په غونډه کې، چې د میرویس نیکه پوهنتون د رئیس، محمد واسیع صدیقي، په وینا پیل شوه، د افغانستان د علومو اکاډمۍ، د اطلاعاتو او کلتور وزارت، کندهار پوهنتون، د کابل پوهنتون پخواني استاد پوهاند بشیر دودیال، مورخ او لیکوال ډاکټر نوراحمد خالدي، منډیګک بنسټ او مشهورې شاعرې مېرمن پروین ملال پیغامونه هم ولوستل شول.
د سیمینار په علمي برخو کې لسګونو څېړونکو او استادانو خپلې علمي مقالې وړاندې کړې چې پکې د میرویس نیکه د مبارزې، د هوتکي پاڅون، د هغه وخت د سیاسي او ټولنیزو شرایطو او تاریخي ارزښت په اړه بېلابېل علمي بحثونه وشول.
د پروګرام په وروستۍ برخه کې د ګډونوالو پوښتنو ته د پنل غړو ځوابونه وویل، د سیمینار لنډیز او وړاندیزونه له رسنیو او ګډونوالو سره شریک شول او اعلان وشو چې ټولې علمي مقالې به په ځانګړې ټولګه کې چاپ او خپرې شي.
د غونډې په پای کې ګډونوالو، ویناوالو او همکارانو ته ستاینلیکونه، مننلیکونه او د کتابونو ډالۍ ورکړل شوې.
د تنظیموونکو په وینا، په دې علمي سیمینار کې شاوخوا سل تنو فرهنګپالو، لیکوالانو، استادانو، څېړونکو او ځوانانو ګډون کړی وو.