تاند (شنبه، د وږي/ سنبلې ۲۸ مه) – ساینسپوهان وايي، د ویښتانو د تویېدو د دودیزو درملنو پر ځای اوس داسې نوې لارې څېړل کېږي چې نه یوازې د ویښتانو تویېدل کموي، بلکې د له منځه تللو ویښتانو د بېرته راشنه کېدو وړتیا هم لري.
د څېړونکو په وینا، څو نوې تجربوي درملنې د ویښتانو د ریښو (فولیکلونو) د بیا فعالولو لپاره هیله بښونکې پایلې ښودلې دي.
د دغو لارو له ډلې یوه ځانګړې پېچکاري ده چې د پرولاکتین ریسیپټر په نښه کولو سره غیرفعال شوي فولیکلونه بېرته فعالوي. دا درملنه په حیواناتو بریالۍ ازمویل شوې او اوس یې پر انسانانو کلینیکي ازموینې روانې دي.
همداراز، د کلیفورنیا پوهنتون څېړونکو موندلې چې د ویښتانو په سټیم حجرو کې د لېکټېټ تولید زیاتول د ویښتانو وده هڅوي. د همدې څېړنې پر بنسټ یوه نوې درملنه هم ایجاد شوې چې د ویښتانو طبیعي وده بېرته راژوندي کوي.
بله څېړنه ښيي چې طبیعي ډياکسي رایبوز شکر د ویښتانو د ریښو شاوخوا د وینې د نویو رګونو په جوړېدو کې مرسته کوي، چې له امله یې ریښو ته ډېر اکسیجن او غذایي مواد رسېږي.
په همدې حال کې، جاپاني او امریکايي ساینسپوهانو د سټیم حجرو او نسجي انجینرۍ په مرسته په لابراتوار کې د ویښتانو مصنوعي فولیکلونه جوړ کړي، چې د طبیعي ویښتانو په څېر د ودې وړتیا لري. کارپوهان وايي، دا پرمختګ په ځانګړي ډول د هغو کسانو لپاره مهم دی چې د شدیدې پکوالي (ګنجي توب) یا پېښو له امله یې ویښتان له لاسه ورکړي دي.
سربېره پر دې، د پرمختللې تصویري ټکنالوژۍ په مرسته څېړونکو موندلې چې ویښتان یوازې له ریښو نه راټوکېږي، بلکې د فولیکل ځانګړې حجرې یې په منظم ډول پورته هم راکاږي. تمه ده دا موندنه په راتلونکي کې د لا اغېزمنو درملنو بنسټ کېږدي.
سره له دې چې دا ټولې درملنې لا هم د څېړنې او کلینیکي ازموینو په پړاو کې دي او ښايي بازار ته د رسېدو لپاره څو کاله وخت ونیسي، خو متخصصان وايي د مصنوعي ځیرکتیا، سټیم حجرو او بیا رغوونکې درملنې په برخو کې چټک پرمختګ د ګنجوالي د بشپړې درملنې هیلې تر پخوا ډېرې کړې دي.