تاند (پنجشنبه د چنګاښ/سرطان ۱۱مه) د قطر د بهرنیو چارو وزارت ویاند، ماجد الانصاري ویلي چې د قطر او پاکستان منځګړو له ایراني او امریکايي مذاکره کوونکو سره خپلې جلا جلا ناستې کړې دي.
نړیوالو رسنیو د قطر د بهرنیو چارو وزارت د ویاند له قوله راپور ورکړی، چې د دواړو هېوادونو د منځګړو خبرې له ایراني او امریکايي استازو سره په ښه ډول مخته تللې دي.
د راپور له مخې، ایران او امریکا هوکړه کړې چې د ایران د پخواني مشر علي خامنهيي د جنازې او خاورو سپارلو له مراسمو وروسته به د خبرو راتلونکی پړاو بیا پیل کړي.
ټاکل شوې ده د خامنهيي د جنازې مراسم د شنبې په ورځ پیل او د چنګاښ تر ۱۸مې دوام وکړي.
د راپورونو له مخې، نوموړی د تېرې میاشتې په نهمه د امریکا او اسراییل په ګډ برید کې وژل شوی و.
د نړیوالو چارو کارپوهان وایي، که د ایران او امریکا خبرې له سره پیل شي، دا به د سیمهییز کړکېچ د کمېدو او د ډیپلوماټیکو حللارو د موندلو لپاره یو مهم فرصت وي.
د دوی په اند، د خبرو دوام کولی شي د سیمې پر امنیت، سیاسي ثبات او اقتصادي وضعیت مثبت اغېز ولري، که څه هم د دواړو لورو ترمنځ لا هم مهم اختلافات پر خپل ځای پاتې دي.