تاند (پنجشنبه د چنګاښ/سرطان ۱۱مه) د سره صلیب نړیوالې کمېټې (ICRC) ویلي، چې په افغانستان کې یې له ۲۵۰ سېلابځپلو کورنیو سره مرسته کړې ده.
دې ادارې نن (پنجشنبه، د چنګاښ ۱۱مه) پر خپلې اېکسپاڼې لیکلي، چې دغه نغدي مرسته د ننګرهار ولایت د دور بابا ولسوالۍ سېلابځپلو کورنیو ته وېشل شوې ده.
د سره صلیب نړیوالې کمېټې په وینا، دا مرسته به له زیانمنو کورنیو سره مرسته وکړي، څو خپلې لومړنۍ اړتیاوې پوره او بېرته عادي ژوند ته راستانه شي.
تر دې وړاندې هم د ننګرهار په ګډون د هېواد په بېلابېلو ولایتونو کې سېلابځپلو د بشري مرستو د زیاتوالي غوښتنه کړې وه.
د نظرخاوندان وایي، له سېلابځپلو کورنیو سره بېړنۍ نغدي مرستې د هغوی د لومړنیو اړتیاوو په پوره کولو کې مهم رول لري، خو ټینګار کوي چې د طبیعي پېښو د اغېزو د کمولو لپاره د اوږدمهاله بیارغونې، د خطرونو د مدیریت او د زیانمنو سیمو د بنسټیزو خدمتونو پیاوړتیا ته هم اړتیا ده.