په دې لیکنه کې دې پوښتنو ته ځواب ویل شوی:
*په اومېندواره ښځه کې سپرم ته څه پېښېږي.
*په امیندواره ښځه کې سپرم چیري ځي؟
*ایا اومیندواره ښځه بیا هم اومیندواره کېدای شي؟
*ایا سپرم اومیندوارو ښځو ته خطر پېښولی شي؟
ډېری امیندوارې ښځې او د هغوی مېړونه اندېښنه لري چې ښايي د جنسي اړیکې پر مهال سپرم پر جنین اغېز وکړي یا ماشوم ته زیان ورسوي. خو طبي څېړنې ښيي چې په عادي او ټیټ خطر لرونکې امیندوارۍ کې سپرم او جنسي اړیکه عموماً خوندي وي.
د امیندوارې ښځې په بدن کې سپرم ته څه پېښېږي؟
کله چې د جنسي اړیکې پر مهال سپرم د ښځې مهبل ته داخل شي، د هغه ډېره برخه وروسته د مهبل له لارې له بدن څخه وځي.
په همدې وخت کې جنین د څو طبیعي محافظتي پوښونو تر ساتنې لاندې وي:
- پلاسنټا (جفت)
- امنیوتیک کڅوړه (د اوبو کڅوړه)
- د رحم د غاړې مخاطي پلګ (Mucus Plug)
دغه محافظتي سیستمونه نه یوازې جنین له میکروبونو او انتاناتو ساتي، بلکې سپرم هم زیلانځ (رحم) ته د ننوتلو او جنین ته د رسېدو مخه نیسي.
سپرم د امیندوارۍ پر مهال چېرته ځي؟
سپرم عموماً په مهبل کې پاتې کېږي او وروسته بهر وځي. د رحم د غاړې مخاطي پلګ د سپرم د پورته تګ مخه نیسي، نو جنین ته نه رسېږي او زیان نه شي رسولای.
ایا امیندواره ښځه بیا هم امیندواره کېدای شي؟
په طبي اصطلاح کې دې ته سوپرفیټېشن (Superfetation) ویل کېږي؛ یعنې یوه ښځه د امیندوارۍ پر مهال یو ځل بیا حامله شي.
دا حالت په انسانانو کې خورا نادر دی او تر اوسه په نړۍ کې یوازې څو محدودې پېښې ثبت شوې دي.
د دې نادروالي مهم دلیلونه:
- د امیندوارۍ پر مهال د هګیو تولید (Ovulation) درېږي.
- د رحم د غاړې مخاطي پلګ د سپرم د تېرېدو مخه نیسي.
- د نوې القاح شوې هګۍ لپاره د رحم مناسب شرایط نه وي.
له همدې امله، کله چې یوه بریالۍ امیندوارۍ رامنځته شي، د بلې امیندوارۍ احتمال کابو صفر ته رسېږي.
ایا سپرم د امیندوارو ښځو لپاره خوندي دی؟
هو، په عادي امیندوارۍ کې سپرم عموماً خوندي ګڼل کېږي.
ځینې احتمالي ګټې یې دا دي:
د زېږون له چمتووالي سره مرسته
په سپرم کې شته پروستاګلانډین مواد د رحم د غاړې په نرمېدو کې مرسته کولای شي. همدا ډول د جنسي اړیکې پر مهال د اکسیټوسین هورمون ازادېدل د زېږون له طبیعي انقباضاتو سره ورته اغېز لري.
د مزاج ښه والی
جنسي اړیکه د امیندوارو ښځو روحي وضعیت ښه کوي، فشار کموي او د وینې جریان زیاتوي.
د ځینو پیچلتیاوو د خطر کمېدل
ځینې څېړنې ښيي چې د مېړه له سپرم سره اوږدمهاله تماس په لومړي ځل امیندوارو شویو ښځو کې د پریاکلامپسیا (د امیندوارۍ د لوړ فشار ناروغۍ) خطر کمولای شي.
مهمه خبره: د جنسي ناروغیو د سرایت خطر
که څه هم سپرم عموماً خوندي دی، خو جنسي لېږدېدونکې ناروغۍ (STIs) د امیندوارۍ پر مهال هم انتقالېدای شي. له همدې امله که د ناروغۍ خطر موجود وي، باید مناسب محافظتي وسایل وکارول شي.
ځکه دا ډول انتانات کولای شي:
- تر وخت مخکې زېږون،
- سقط،
- او د مور او ماشوم نورې روغتیايي ستونزې رامنځته کړي.
لنډه پایله
په عادي امیندوارۍ کې:
- سپرم جنین ته نه رسېږي او زیان نه ورته رسوي.
- د امیندوارې ښځې بیا امیندواره کېدل خورا نادره پېښه ده.
- جنسي اړیکه او سپرم عموماً خوندي دي او حتی ځینې روغتیايي ګټې هم لرلای شي.
- د هر ډول ځانګړو اندېښنو یا د لوړ خطر امیندوارۍ په صورت کې باید له ډاکټر سره مشوره وشي.