ټرمپ او پزشکیان تفاهم‌لیک الکترونیکي لاسلیک وکړ

تاند (پنجشنبه، د غبرګولي/ جوزا ۲۸ مه) د ایران د بهرنیو چارو وزارت ویاند اسماعیا بقايي تایید کړې چې د ایران او امریکا ترمنځ تفاهم‌لیک په الکترونیکي او مجازي بڼه لاسلیک شوی او رسمي بڼه یې خپله کړې ده.

د نوموړي په وینا، که څه هم مخکې ویل شوي و چې دا سند به د امریکا د مرستیال ولسمشر جې ډي ونس او د ایران د پارلمان د رئیس محمدباقر قالیباف له خوا لاسلیک شي، خو په پای کې پرېکړه وشوه چې د دواړو هېوادونو تر ټولو لوړپوړي اجرايي مشران، یعنې مسعود پزشکیان او ډنالډ ټرمپ به یې په الکترونیکي ډول لاسلیک کړي.

اسماعیل بقایي زیاته کړه چې له دې امله د ځانګړو مراسمو اړتیا نشته، خو د دواړو هېوادونو استازي به د پخواني پلان له مخې د خبرو اترو د دوهم پړاو د پیل لپاره د سویس جینیوا ته سفر وکړي.

د راپور له مخې، د سپینې ماڼۍ یوه چارواکي هم دا موضوع تایید کړې ده.

بقایي: د ایران اتومي مواد به له هېواده ونه ایستل شي

د ایران د بهرنیو چارو وزارت ویاند اسماعیل بقایي ټینګار وکړ چې «د ایران اتومي مواد به له هېواده ونه ایستل شي» او ویې ویل چې د هوکړې له مخې، ایران کولای شي لوړ بډای شوی یورانیم د هېواد دننه رقیق کړي.

تر دې وړاندې ډونالډ ټرمپ هم دې ډول یوې طرحې ته اشاره کړې وه، خو ویلي یې و چې دا به د امریکا د متخصصانو او د اتومي انرژۍ د نړیوالې ادارې تر څارنې لاندې ترسره کېږي.

د ایران د بهرنیو چارو وزارت ویاند همداراز ټینګار وکړ چې د هوکړې د متن فارسي او انګلیسي نسخې یو شان دي او زیاته یې کړه چې «مقابل لوري (امریکا) د متن فارسي نسخه هم لاسلیک کړې ده.»

اسماعیل بقایي په ورته وخت کې وویل چې د تفاهم‌لیک د مادو عملي کول او ورته ژمنتیا یو متقابل او دوه‌اړخیز اصل دی، او د ایران د ژمنو د پلي کېدو کچه به د امریکا له لوري د خپلو ژمنو د عملي کولو او پابندۍ پورې تړلې وي.