تاند، سه شنبه، د جوزا ۶مه: ترکي سمندري ځواکونو د ازمیر د فوکا ساحل په ساحه کې د ۳۴ افغانانو په شمول ۷۲ پناه غوښتونکي له ډوبېدو ژغورلي دي.
ترکي ځواکونو ویلي ژغورل شوي کسان د افغانستان تر څنګ د کانګو، ګانا او پاکستان اوسېدونکي دي چې ښځې او ماشومان هم پکې شامل دي.
د ترکیې د کورنیو چارو وزارت ویلي، په څلورو کښتیو کې سپاره ژغورل شویو کډوالو کې یې ۳۴ تنه د افغانستان، ۱۸ تنه د کانګو، ۱۲ تنه د افریقا، ۶ تنه د ګانا او ۲ تنه د پاکستان اوسېدونکي وو.
وزارت ویلي، د کډوالو دا کښتۍ یوناني ځواکونو اړ کړې وې چې خپله لار او مسیر بدل کړي، خو د دوی مرستندویه ډلې ور رسېدلي او دا کډوال یې د مهاجرت دفتر اړوند کمپ ته رسولي دي.