تاند (یکشنبه د غبرګولي/ جوزا ۱۰مه) نورستان کې د طالبانو د حکومت مسوولان وايي، چې د دې ولایت په یوه تفریحي سیمه کې د څو سیلانیانو د ډزو له امله یو کس وژل شوی دی.
د ولایت په یوه خبرپاڼه کې لیکل شوي چې، دا پېښه د ولایت په مرکز کې د شتیوي تفریحي سیمې کې رامنځته شوه، چې د زین السلام په نوم یو ځایي اوسېدونکی پکې ووژل شو.
په خبرپاڼه کې راغلي چې، له پېښې وروسته، د امنیتي ځواکونو لخوا ښکیل کسان نیول شوي او د پېښې د نورو جزیاتو د روښانه کولو لپاره پلټنې روانې دي.
د نورستان سیمهییزو مسوولانو د پېښې په اړه د خواشینۍ په څرګندولو سره، په ټولو اتباعو او سېلانیانو غږ کړی چې ولایت ته سفر وکړي او تفریح وکړي، د امنیتي اصولو او پلي کېدونکو قوانینو څارنه وکړي.
له دې سره پرون شنبه هم په دې ولایت کې د یوه موټر چپه کېدو پېښې کې څلور تنه مړه شوي وو او څلور نور ورک وو.