له نجونو پرته؛ سبا په ۱۸ ولایتونو کې د کانکور دويم پړاو ازموينه اخیستل کېږي

تاند ( چهارشنبه د ثور/ غويي ۳۰مه) افغانستان کې د طالبانو د حکومت د ازموینو عمومي ادارې ویلي، د روان ۱۴۰۵ کال د کانکور ازموینې دویم پړاو سبا پنجشنبه د هېواد په ۱۸ ولایتونو کې پیلیږي.

دغې ادارې نن چهارشنبه په یوه خبرپاڼه کې ویلي چې، د کانکور دویم پړاو ازموینه به پنجشیر، لغمان، کندوز، جوزجان، کندهار، بامیان، پکتیا، تخار، سمنګان، فراه، هلمند، دایکندي، ننګرهار، نیمروز، بلخ، خوست او زابل ولایتونو کې واخیستل شي.

یادې ادارې زیاته کړې چې، دغه راز به د نورستان درې مرکزي، ختیځې او لوېدیځې حوزې به هم په‌کې شاملې وي.

د طالبانو د دغې ادارې په خبرپاڼه کې ویل شوي چې دغه ازموینه به سبا د ثور په ۳۱مه او د جوزا په لومړۍ نېټه واخیستل شي او د ننګرهار ولایت د درېیمې ورځې ازموینه به د جوزا په ۲مه واخیستل شي.

دغه راز ویل شوي چې د ۱۴۰۵ کال د کانکور له څلورو پړاوونو ازموینو وروسته به د ننګرهار، لغمان، کندهار، هلمند، فراه او نیمروز ولایتونو د څوارلسم پاسانو ازموینه هم تنظیم شي.

دغه ازموینه په داسې حال کې ترسره کېږي، چې د طالبانو له بیا واکمنېدو راهیسې له شپږم ټولګي پورته د نجونو زده‌کړې بندې دي.

له دې سره دا په افغانستان کې پنځم پرله‌پسې ځل دی، چې د کانکور ازموینه د نجونو له ګډون پرته ترسره کېږي.

د نجونو پر زده‌کړو بندیزونو په کور دننه او بهر پراخ غبرګونونه راپارولي او د نړیوالې ټولنې له لوري د طالبانو د رسمیت پېژندلو له مهمو شرطونو څخه هم د نجونو د ښوونځیو بیا پرانیستل بلل کېږي.

تر ۱۷۰۰ ورځو ډېرې تېرېږي چې، د نجونو پر مخ د زده کړو دروازې تړلي خو د کورني او نړیوالو غوښتنو سره سره طالبانو له نجونو سره دا ضد نه دی پریښی او نه هم داسې هیلې ښکاره شوي چې، کله به د نجونو پر وړاندې شته بندیزونه لرې شي او که نه.