تاند (شنبه د ثور/ غويي ۲۶مه) د افغانستان د کورني کرکټ سترې لوبې «لېسټ ای» سبا یکشنبه د ننګرهار په کوربه توب پيلېږی.
دغه لوبې د ننګرهار په غازي امان الله خان لوبغالي کې پيلېږي.
کرکټ بورډ وایي، چې په دې لوبو کې په لیګونو کې د بوختو افغان ملي لوبغاړو پرته ټول ملي لوبغاړي ګډون لري.
لومړۍ لوبه سبا سهار نهه بجې د بند امیر او مس عینک زون لوبډلو ترمنځ کېږي.
د ننګرهار کرکټ بورډ ولایتي ادارې له عامو خلکو او کرکټ مینه والو غوښتي چې، لوبغالي ته ورشي او لوبې له نېږدې ننداره کړي.
لېسټ ای د افغانستان په کورني کرکټ کې یو ورځنۍ سترې سیالۍ ګڼل کېږي چې، په کې د افغانستان کورني او ملي لوبغاړي ګډ لوبېږي او نویو ځوانانو ته د مخته تګ یو ښه چانس هم ګڼل کېږي.