تاند (جمعه د ثور/ غويي ۲۵مه) د برېتانیا حکومت په رسمي ډول اعلان وکړ، چې د افغانانو د بیا مېشتېدنې په پروګرام کې یې سخت بدلونونه راوستي دي.
د برېتانیا حکومت ویلي چې، په دې بدلونونو کې له افغانستان څخه د لېږد په برخه کې د لوژستیکي مرستو پای ته رسول او تر ۲۰۲۸ کال پورې د دغه پروګرام بشپړ تړل شامل دي.
سرچینې ویلي چې، له دې وروسته له هغو افغانانو سره چې په شرایطو برابردي، له افغانستان څخه درېیم هېواد ته د وتلو په برخه کې هېڅ ډول لوژستیکي مرسته نه کوي.
تر دې وړاندې به د برېتانیا دفاع وزارت د سفر په تنظیم، د پولو په موندلو او امنیتي مشورو کې مرسته کوله، خو اوس دا کسان باید په خپله خوښه او مسوولیت درېیم هواد ته ځان ورسوي.
د راپورونو لهمخې هغه کسان چې د منل کېدو لیکونه ترلاسه کوي، یوازې ۱۲ میاشتې وخت لري چې د درېیم هېواد ویزې مرکز ته حاضر شي او خپل بایومیټریک ثبت کړي.
د هغو کسانو لپاره چې تر اوسه په شرایېو برابر نه دي پېژندل شوي، حکومت تمه لري چې د ۲۰۲۷ کال تر پسرلي پورې به د ټولو غوښتونکو برخلیک وټاکي.
برېتانیا وروستی نېټه د ۲۰۲۸ کال ډسمبر ټاکلې ده.
یاد حکومت ویلي چې، له دې نېټې وروسته به د افغانانو د بیا مېشتېددنې ټولې چارې او لېږدونه په بشپړ ډول پای ته ورسیږي.