تاند (چهارشنبه د ثور/ غويي ۲۳مه) د ملګرو ملتونو د وګړو صندوق (UNFPA) وایي چې، سلووینیا دولت به د افغان ښځو او نجونو لپاره ۲۰۰ زره یورو ځانګړي کړي.
ملګري ملتونو ویلي چې، دا مرسته د روغتیايي خدماتو اړوند پروګرامونو د پياوړتیا په موخه کوي.
په دې اړه د خپرې شوې خبرپاڼې له مخې، دا مالي ملاتړ به د روغتیايي خدماتو، په ځانګړې توګه له زیږون دمخه پاملرنې، خوندي زیږون او له زیږون وروسته پاملرنې په برخو کې د پیاوړتیا په موخه وشي.
خبرپاڼه کې راغلي چې، په افغانستان کې اوسمهال ښځې او نجونې روغتیایي خدماتو ته د لاسرسي په برخه کې له جدي محدودیتونو سره مخ دي.
د ملګرو ملتونو د وګړو صندوق همداراز زیاته کړې چې، دا پیسې به د نورو پروګرامونو په منځ کې د میندو د وضعیت ښهکولو، د امیندوارۍ پرمهال د خطرونو کمولو او د نوي زیږیدلو ماشومانو د ساتنې لپاره وکارول شي.
دغه راز په دا مرسته د لومړنیو روغتیایي خدمتونو پراخولو او د مور او ماشوم مړینې د کچې په کمولو کې هم مهم رول ولوبوي.
نړیوال سازمانونه په افغانستان کې د روغتیايي اسانتیاوو کمښت، اقتصادي محدودیتونه او د سرچینو نشتوالی هغه عوامل بولي چې، د دوی په وینا د زیږون پرمهال یې روغتیايي اړینو خدماتو ته د ډیری میرمنو او نجونو لاسرسی ستونزمن کړی دی.