تاند (دوشنبه، د غويي/ ثور ۲۱ مه) د پاکستان د بهرنیو چارو وزارت ویلي چې په اسلام اباد کې د افغانستان د سفارت شارژدافیر یې د بنو د ځانمرګي برید په تړاو وربللی او ورته یې «سخت احتجاج» سپارلی دی. په دغه برید کې ۱۵ پولیس وژل شوي وو.
د پاکستان د بهرنیو چارو وزارت د دوشنبې په ورځ په یوه خبرپاڼه کې ویلي: «د افغانستان شارژدافیر نن د بهرنیو چارو وزارت ته وروبلل شو، څو د خیبر پښتونخوا د بنو ولسوالۍ د فتحخېل د پولیسو پر پوستې د موټربمي برید په اړه سخت احتجاج ورته وسپارل شي.
د مې په ۹مه د دې برید مسوولیت د اتحاد المجاهدین په نوم ډلې په غاړه واخیست چې ویل کېږي د پاکستاني طالبانو یوه له بېلابېلو ډلو څخه ده.
د پاکستان د بهرنیو چارو وزارت ویلي، د پېښې د څېړنو، راټولو شویو شواهدو او تخنیکي استخباراتي معلوماتو له مخې څرګندېږي چې دا برید په افغانستان کې مېشتو وسلهوالو طرحه کړی و.
پاکستان تر دې وړاندې هم په خپله خاوره کې تقریباً د ټولو حملو پړه په افغانستان اچولې او د اکثرو بریدونو عاملان هم افغانان بولي.
د پاکستان د باندنیو چارو وزارت په خبرپاڼه کې راغلي: «پاکستان یو ځل بیا خپله ژوره اندېښنه څرګنده کړه چې د افغانستان خاوره د پاکستان پر ضد د ترهګریزو بریدونو لپاره کارول کېږي، او افغان لوري ته ټینګار وشو چې پاکستان د دې وحشیانه برید د عاملانو پر ضد د قاطع اقدام حق لري.»
پاکستاني چارواکو همداراز ویلي چې د افغانستان په خاوره کې د بېلابېلو ترهګرو ډلو موجودیت او د هغوی لپاره د فعالیت زمینه، د ملګرو ملتونو د څار ډلې او نورو نړیوالو بنسټونو په راپورونو کې هم ثبت شوې ده.
د پاکستان د بهرنیو چارو وزارت زیاته کړې: «د ترهګرۍ پر ضد مبارزه ګډ مسوولیت دی، او افغان طالبان باید پر خپلې هغې ژمنې ودرېږي چې اجازه به نه ورکوي د افغانستان خاوره د نورو هېوادونو پر ضد وکارول شي.»
د طالبانو حکومت د پاکستان د بهرنیو چارو وزارت د دې تازه څرګندونو او د شارژدافېر د احضارېدو په اړه څه نه دي ویلي خو تر دې وړاندې یې تل د پاکستان دا ډول تورونه رد کړي او ویلي چې دوی هیچا ته اجازه نه ورکوي چې د افغانستان خاوره د بل هیواد پر ضد وکاروي او پاکستان هم باید خپلې کورنۍ ستونزه په خپله خاوره کې پهخپله جل کړي.