تاند (پنج شنبه د ثور/ غويي ۱۷مه) په میدانوردګ ولایت کې د طالبانو د طبیعي پېښو پر وړاندې د مبارزې ریاست ویلي، د دایمیرداد ولسوالۍ «اورمړ» کلي کې یوې پخوانۍ ناچاوده هاوان سرګلولې چاودنه کړې ده.
یاد ریاست په یوه خبرپاڼه کې زیاته کړې چې، د چاودنې له امله شپږ ماشومان ټپیان شوي.
خبرپاڼه کې ویل شوي چې، ټپیانو کې د درېیو ماشومانو روغتیايي وضعیت نازک دی او د درملنې لپاره ولایتي روغتون ته لېږدول شوي.
په یاد ولایت کې د طالبانو د طبیعي پېښو پر وړاندې د مبارزې رییس مولوي احمدشاه ذهین د ټپیانو کورنیو سره د هر ډول مرستې ډاډ ورکړی.
هغه له خلکو غوښتي چې د ناچاودو توکو د لیدلو پر مهال ترې لرې پاتې شي او اړوندو ادارو ته خبر ورکړي، څو د ورته پېښو مخه ونیول شي.