تاند (شنبه د غویي/ثور ۵مه) افغانستان کې د طالبانو د حکومت د ریاستالوزرا اقتصادي معاونیت په غونډه کې په کابل کې د ګلبهار استوګنیز او سوداګریز ښارګوټي د جوړولو طرحه او پرنسیپ تایید کړه.
یاد معاونیت په یوه خبرپاڼه کې ویلي چې، د ګلبهار استوګنیز او سوداګریز ښارګوټي د جوړولو لپاره خصوصي سکټور د شاوخوا اته میلیارده ډالرو پانګونې لېوالتیا ښودلې ده.
دغه ښارګوټی په ۱۱ زره جریبه جوړېږي.
د مالوماتو له مخې په دې ښارګوټي کې به لسګونو زرو هېوادوالو ته د سرپناه برابرولو ترڅنګ زرګونه کاري فرصتونه هم برابر شي.
دا طرحه داسې مهال تائیدېږي چې، د مرکز کابل په ګډون د هیواد په ټولو ولایتونو کې خلک د سرپناه له کمښت سره مخ دي.
عام خلک وایي په دې وروستیو کې هیواد ته د کډوالو بېرته راتګ سره د استوګنې د کورونو کمښت ستونزه نوره هم زیاته شوې ده.