تاند (چهارشنبه د غوئي – ثور ۲مه) افغانستان کې د طالبانو د حکومت د بهرنیو چارو وزیر امیرخان متقي د ایران او امریکا ترمنځ د ډيپلوماسۍ پر بنسټ چلند رغنده ګام وباله.
یاد وزارت وايي چې، امیرخان متقي له خپل ایراني سیال سیدعباس عراقچي سره د سیمې پر روان وضعیت او دوه اړخیزو اړیکو په اړه ټلیفوني خبرې وکړې.
متقي همدا راز د دواړو هېوادونو ترمنځ د سوداګریزو راکړو ورکړو د زیاتېدو او په نورو برخو کې د همکاریو د پراخېدو هرکلی کړی دی.
هغه د ایران او امریکا له لوري د ډیپلوماسۍ پر بنسټ چلند رغنده ګام وباله او د خبرو اترو او مذاکراتو له لارې د مسایلو پر حل یې ټینګار وکړ.
بل لورته بیا عباس عراقچي خپل افغان سیال د ایران او امریکا ترمنځ د خبرو اترو له وروستي وضعیت خبر کړ.