تاند (سې شنبه، د وري/ حمل ۲۵ مه) د چین په ووهان ښار کې د نړۍ تر ټولو اوږده اتومات زینه (اسکلیټر) جوړه شوې ده چې په ټولنیزو رسنیو کې یې ډېر پام ځان ته اړولی دی.
دا ځانګړې زینه د «ګودېس» په نوم یادیږي او اوږدوالی یې ۹۰۵ متره دی. تر دې اوږد اسکلېټر په نړۍ کې نه شته.
په دې سیستم کې ۲۱ جلا برقي زینې، ۸ لفټونه، ۴ خوځنده پلې لارې او څو د پلیو پلونه شامل دي، چې دا ټول یو پرمختللی او منظم ترانسپورتي سیستم جوړوي. دا زینه کولی شي خلک د ۸۰ پوړیزې ودانۍ (یا ۲۴۲ متره) په اندازه لوړوالي ته په شاوخوا ۲۱ دقیقو کې ورسوي، چې دا د دې اسکلیټر د حیرانوونکې وړتیا او پرمختګ ښکارندویي کوي.
د شپې پر مهال، کله چې دا زینه په رنګارنګ څراغونو روښانه شي، نو یوه ډېره ښکلې او زړه راښکونکې منظره وړاندې کوي چې لیدونکي ځان ته جذبوي.
د دې پروژې موخه دا ده چې د ښار د زیاتېدونکي نفوس لپاره د تګ راتګ اسانتیاوې برابرې کړي او د ښار ښکلا نوره هم زیاته کړي.
دا اسکلیټر په فبرورۍ کې افتتاح شو.