تاند (پنج شنبه د وري – حمل ۲۰مه) د کرېک انفو د راپور لهمخې د افغانستان او نړۍ مخکښ ورو توپ اچوونکی راشد خان وايي، د خپل کرکټ راتلونکي د اوږدولو لپاره اړ دی په ټېسټ کرکټ کې خپلې لوبې محدودې کړي.
راشد، چې له ۲۰۲۳ کال راهیسې د ملا ټپ لري، اوس کال کې یوازې یو ټېسټ لوبه کوي او وايي د ډاکټرانو له سپارښتنو سره سره یې مخکې ځان ډېر ستړی کړی و.
هغه زیاتوي، که د ټېسټ لوبو له امله ټپ بیا زیات شي، ښايي نور د افغانستان لپاره ونه لوبېږي.
هغه وایي اوس یې تمرکز د ۲۰۲۷ نړیوال جام لوبو ته دی.
د افغانستان کرکټ بورډتر اوسه په دې تړاو څه نه دي ویلي.
د افغانستان د کرکټ دغه ستوری اوسمهال د هند غوره لیګ کې له ګجرات لوبډلې سره لوبېږي او تېره شپه یې د غوره لوبې پرمهال درې لوبغاړي اوټ کړل او غوره لوبغاړی شو.