تاند (دوشنبه د وري – حمل ۱۰مه) د پاکستان کرېکټ بورډ د دغه هیواد چټک توپ اچوونکی نسیم شاه دوه کروړه/ ۲۰۰ لکه پاکستانۍ کلدارې جریمه کړ.
ده ته دا سزا د پاکستان سوپر لیګ سیالیو د پرانیستلو مراسمو کې د پنجاب د اعلی وزیرې د شتون په اړه د هغه د ټویټ له امله ورکړل شوې ده.
پاکستاني کرکټ بورډ ویلي چې، د مارچ په ۲۷ مه نیسم شاه د ټویټ له امله له خپل قرارداد او د پي سي بي د ټولنیزو شبکو د کارونې له اصولو پر سرغړونې تورن شوی و.
اوس وايي نسیم شاه د ټویټ له امله بښنه غوښتې او د ډسپلین کمېټې له څېړنې او بحث وروسته دا پرېکړه شوې ده.
تر اوسه نسیم شاه د دې پرېکړې په اړه څه نه دي ویلي.
د یادونې ده چې، تېره اونۍ د پاکستان سوپر لیګ د سیالیو د پرانیستلو مراسمو کې د پنجاب اعلی وزیرې مریم نواز ګډون کړی و.
په دې وخت کې د نسیم شاه پر اېکس پاڼه یو پوسټ کې لیکل شوي و، چې «ولې هغې ته د لارډز لوبغالي کې د ملکې په څېر هرکلی کېږي؟»
د دې پوست له خپرېدو څو دقیقې وروسته دا پوسټ لرې او ورسره ولیکل شول: «د نسیم شاه د اېکس حساب هک شوی و او اوس بېرته ترلاسه شو».
دې موضوع د ټولنیزو رسنیو پاکستاني کاروونکو کې پراخ غبرګونونه راپارولي او نسیم شاه ته یې د سختې سزا غوښتنې کولې.