تاند (یکشنبه، د وري/ حمل ۹ مه) د طالبانو د بهرنیو چارو وزیر امیر خان متقي د سیمې د تاوتریخوالي، له پاکستان سره د اړیکو او ډیپلوماسۍ په اړه د متحده عربي اماراتو له بهرنیو چارو وزیر سره ټیلیفوني خبرې وکړې.
د باندنیو چارو وزارت د شتبې په ورځ په یوه خبرپاڼه کې ویلي چې امیر خان متقي د متحده عربي اماراتو د مرستیال صدراعظم او بهرنیو چارو وزیر شیخ عبدالله بن زاید آل نهیان سره د مهمو سیاسي او امنیتي موضوعاتو په شمول پر بېلابېلو موضوعاتو ټیلیفوني خبرې کړې دي.
په خپره کړې خبرپاڼه کې ویل شوي چې دواړو لورو د دوهاړخیزو اړیکو، د طالبانو او متحده ایالاتو ترمنځ مسایلو، د سیمې وضعیت او د طالبانو او پاکستان ترمنځ د وروستیو پرمختګونو په اړه خبرې وکړې.
د خبرپاڼې له مخې، متقي خبرداری ورکړی چې د متحده ایالاتو او اسرائیل له لوري د ایران پر وړاندې اقدامات د ټولې سیمې امنیت له ګواښ سره مخامخ کوي. هغه ویلي چې په منځني ختیځ کې د جګړې او بېثباتۍ پراخېدو جدي اندېښنې راولاړې کړې دي.
متحده عربي اماراتو په وروستیو کلونو کې هڅه کړې چې په افغانستان او سیمه کې د منځګړیتوب او ډیپلوماسۍ په برخه کې فعاله ونډه ولري. دغه هېواد له طالبانو سره عملي او سیاسي اړیکې هم ساتلې دي.
د طالبانو د خبرپاڼې له مخې، شیخ عبدالله بن زاید د طالبانو او امریکا اړیکې مهمې بللې او ویلي یې دي چې متحده عربي امارات چمتو دي د سیمې د ستونزو په حل کې رغنده رول ولوبوي.
متقي دا هم ویلي چې طالبان غواړي له پاکستان سره خپلې ستونزې د خبرو او متقابل تفاهم له لارې حل کړي. هغه زیاته کړې چې دوی به اجازه ورنه کړي چې د افغانستان خاوره د پاکستان پر ضد وکارول شي.
هغه همداراز ویلي چې د طالبانو ټول پوځي اقدامات د پاکستان پر وړاندې دفاعي بڼه لري او که کوم برید پرې وشي، دوی د “ځاندفاع حق” ساتي.
په وروستیو میاشتو کې د افغانستان او پاکستان ترمنځ اړیکې خورا ترینګلې شوې دي، او څو ځله ډیپلوماټیک او امنیتي کړکېچونه رامنځته شوي دي. اسلاماباد طالبان تورن کړي چې د افغانستان له خاورې د فعالو وسلهوالو ډلو مخه نه نیسي، خو طالبانو دا تورونه په کلکه ردوي.
هغه هم ټینګار کړی چې د طالبانو او پاکستان ترمنځ دوامداره تاوتریخوالی د هېڅ لوري په ګټه نه دی، او ویلي یې دي چې متحده عربي امارات به د کړکېچ د کمولو او سولهییز حل لپاره خپلو هڅو ته دوام ورکړي.
دا ټیلیفوني خبرې په داسې وخت کې کېږي چې سیمه له زیاتېدونکي بېثباتۍ سره مخ ده او د پراخې جګړې د اندېښنو له امله د سیمې د هېوادونو ترمنځ ډیپلوماټیک تماسونه زیات شوي دي.