تاند (یک شنبه د کب – حوت ۲۴مه) عراق کې د امریکا پخواني سفیر زلمي خلیلزاد په بغداد کې د امریکا پر سفارت د ایران د برید په غبرګون کې ویلي، چې د سفارتونو په نښه کول د نړیوالو قوانینو د بنسټیزو اصولو ښکاره سرغړونه ده.
خلیلزاد دا برید په “کلکو ټکو” غندلی او دا یې د ډیپلوماټیکو اصولو خلاف عمل بللی دی.
نوموړي ویلي چې دا برید یو ځل بیا ثابته کړه چې په تهران کې حاکم حکومت یو “یاغي او له قانون څخه وتلی” رژیم دی.
خلیلزاد ویلي چې، پر سفارتونو برید د نړیوالو حقوقو هغه بنسټ ویشتل دي چې د هېوادونو ترمنځ اړیکې پرې ولاړې وي.
زلمی خلیلزاد په داسې حال کې دا غبرګون ښيي چې تېره ورځ د عراق پلازمېنه بغداد کې د امریکا پر سفارت د توغندي برید شوی وو چې پایله کې یې په ودانۍ کې اور لګېدلی وو.
ایران وروسته له هغې په ځینو هېوادونو کې د امریکا اډې او تازه یې په عراق کې سفارت په نښه کړی چې، څو اونۍ وړاندې امریکاـ اسرائیلو پر دغه هیواد هوایي یرغل پيل کړ او د دغه هیواد مذهبي مشر آیت الله علي خامنه یي یې وواژه.
دغې پېښې دغه روانه جګړه لا پسې سخته او د سیمې ترڅنګ په نړیواله کچه یې اندېښنې زیاتې کړې.