تاند (چهارشنبه، د کب/ حوت ۲۰ مه) د امریکا د متحدوایالتونو ولسمشر، ډونالډ ترمپ ویلي چې له ایران سره روانه جګړه به «ژر پای ته ورسېږي»، ځکه د هغه په وینا « نور ډېر هدفونه نه دي پاتې چې په نخښه یې کړي.»
ټرمپ د چهارشنبې په ورځ (د کب/ حوت ۲۰مه) له اکسیوس امریکايي ویبپاڼې سره په لنډه پنځه دقیقهيي ټلیفوني مرکه کې وویل: «یوازې ځینې کوچني هدفونه دلته او هلته پاتې دي… هر کله چې زه وغواړم دا جګړه پای ته رسېږي.»
د راپور له مخې، که څه هم ټرمپ اشاره کړې چې پوځي عملیات تر ډېره خپل هدف ته رسېدلي، خو امریکايي او اسرائيلي چارواکو ویلي چې تر اوسه د جګړې د پای ته رسېدو په اړه هېڅ رسمي داخلي امر نه دی صادر شوی.
له بلې خوا د اسراییل دفاع وزیر اسراییل کاڅ څو ساعته مخکې ویلي و چې پر ایران به د امریکا او اسرائیل ګډ بریدونه «تر هغه وخته دوام وکړي چې اړتیا وي». هغه ادعا کړې چې دغو بریدونو د ایران ځواکونو ته درانه تلفات اړولي دي.
د اکسیوس د راپور له مخې، اسرائيلي او امریکايي چارواکي وايي چې لږ تر لږه د دوو نورو اوونیو لپاره د ایران په دننه کې د بریدونو پلان هم جوړ شوی دی.
په همدې منځ کې د اسراییل دفاع وزیر ایسراییل کاڅ ویلي چې تر هغو به بریدونه دوام وکړي چې ټول هدفونه پوره شوي نه وي.
داسي ښکاری چې ډونالډ ټرمپ د جګړې د ژر پای ته رسېدو او د اسراییل صدراعظم د جګړې د غځېدو غوښتونکی دی.