تاند (جمعه، د کب/ حوت ۸ مه) د افغانستان د طالبانو د حکومت ویندوی ذبیحالله مجاهد اعلان وکړ چې د ډیورنډ کرښې په اوږدو کې له افغان ځواکونو سره په نښتو کې ۴۰ پاکستاني سرتېري وژل شوي او ۱۵ پوځي پوستې نیول شوې دي.
ښاغلي مجاهد د پنجشنبې په ورځ ناوخته وویل چې د ډیورنډ پر لانجمنه کرښه د روانو نښتو په ترڅ کې افغان ځواکونو ۴۰ پاکستاني سرتېري وژلي او ۱۵ پوځي پوستې یې نیولي دي.
مجاهد په اېکسپاڼه کې په خپره کړې اعلامیه کې ویلي چې دا عملیات په پاکستاني پوځي مرکزونو ترسره شوي، او زیاته کړې یې ده چې یو شمېر سرتېري ټپیان یا نیول شوي هم دي.
هغه ادعا کړې چې طالب جنګیالیو مهم پوځي تأسیسات تر کنټرول لاندې راوستي او د عملیاتو پر مهال یې وسلې او تجهیزات هم نیولي دي. مجاهد تر دې مخکې ویلي وو چې په لومړیو کې اووه پوستې نیول شوې وې، خو وروسته دغه شمېر ۱۵ ته زیات شو.
د طالبانو پوځي ویاند مولوي وحیدالله محمدي وویل چې «غچ اخیستونکي عملیات» د پنجشنبې په ورځ د شپې شاوخوا ۸:۰۰ بجې پیل شوي دي.
د طالبانو ویندوی یوه ورځ وړاندې ویلي و چې دوی له پاکستان څخه د یکشنبې د ورځې د بمبارۍ په وړاندې غچ اخیستونکي عملیات لا پیل کړي نه دي خو ژر به پاکستان ته سبق ورکړي.
ځايي سرچینو د پنجشنبې په ورځ راپور ورکړی وو چې په څو سرحدي ولسوالیو کې د پاکستاني پوځي مرکزونو پر ضد پراخ عملیات پیل شوي دي.
پاکستاني چارواکو بیا ویلي چې دوی د افغانستان څو پوستې ویشتې او له منځه وړي دي.
دا وروستۍ زیاتېدونکې نښتې په وروستیو میاشتو کې پر ډیورند کرښه تر ټولو جدي شخړې بلل کېږي، چې په سیمه کې د لا زیاتې بېثباتۍ اندېښنې راپاروي.
فطرت: په غچ اخیستونکو بریدونو کې د پاکستاني پوځیانو مرګ ژوبله ۴۰ ته پورته شوه