تاند ( شنبه د کب – حوت ۲مه ) نیویارک ټایمز په یوه راپور کې ویلي چې، واشنګټن په سیمه کې له خپلو ځینو اډو خپل سلګونه سرتېري ایستلي دي.
د نیویارک ټایمز راپور کې راغلي چې، پنټاګون دغه سرتېري د قطر د العدید هوايي اډې او بحرین له اډو څخه ایستلي دي.
سرچینې لیکلي چې، دغه اقدام د ایران د احتمالي غچ اخیستونکو بریدونو په وړاندې د دفاعي اقداماتو د یوې برخې په توګه اخیستل شوی دی.
دغه راز رویټرز د دوو امریکایي چارواکو په حواله ویلي چې، د ایران په اړه د امریکا پوځي پلان یوې پرمختللې مرحلې ته رسېدلی دی.
د دوی په وینا، هغه انتخابونه چې په پام کې نیول شوي دي په برید کې د ځانګړو اشخاصو په نښه کول او حتی په تهران کې د رژیم بدلون تعقیبول شامل دي خو زیاتوي چې، که چیرې د متحده ایالاتو ولسمشر امر وکړي.
رویټرز مخکې راپور ورکړی و چې د متحده ایالاتو پوځ د ایران اسلامي جمهوریت په وړاندې د دوامداره، څو اونیو عملیاتو ترسره کولو لپاره چمتووالی نیسي.
د ایران او امریکا ترمنځ دوامداره کړکیچ ته په اشارې سره، جرمني او فرانسې له خپلو ټولو اتباعو څخه غوښتي چې سملاسي له ایران څخه ووځي.