تاند ( پنجشنبه د سلواغې ـ دلوې ۳۰مه) په بدخشان کې د طالبانو والي اسماعیل غزنوي وایي، ټاکل شوې چې د ملاهبت الله په لاسلیک ۱۰۰۰ نور جنګیالي بدخشان ته ولاړ شي.
غزنوي زیاته کړې چې دا کار په دغه ولایت کې د سرو زرو کانونو د کېندنې د شرکتونو د خوندیتوب لپاره کېږي.
د هغه په وینا؛ دغه ځواک د پانګونې ساتنې او د کانونو د پروسې د تنظیم لپاره جوړ شوی دی.
غزنوي رسنیو سره په یوه مرکه کې ویلي، چې د بدخشان په کانونو کې پانګونه ساتنې او منظم مدیریت ته اړتیا لري او له همدې امله د کانونو د امنیت ډاډمنتیا لپاره د یوه ځانګړي ځواک جوړولو وړاندیز شوی دی.
په بدخشان کې د طالبانو والي وایي، چې د دغه ځواکونو فعالیتونه به ډېر ژر پیل او تخنیکي چارې یې روانې دي.
غزنوي دا هم وویل، چې له دغه کانونو ترلاسه شوي عاید د طالبانو حکومت پورې اړه لري؛ خو دغه عاید به د عامه ګټو پروژو لپاره په ځانګړې توګه په بدخشان ولایت کې وکارول شي.
دا ځواک په داسې مهال جوړېږي چې، په وروستیو میاشتو کې په بدخشان کې د ځایي اوسېدونکو او د طالبانو د کانونو د کېندنې شرکتونو ترمنځ نښتې زیاتې شوې دي.
د طالبانو د کانونو او پټرولیم وزارت وایي، په بدخشان کې ۱۰۰زره کسان د یادې ډلې لپاره د سرو زرو کانونه پر کېندنې بوخت دي.
د یاد وزارت په وینا؛ دغه کسان په مستقیمه او نامستقیمه توګه د شهر بزرګ، یاوان، کوهستان، راغستان، خوان او ارغنجخواه کانونو کې فعالیت لري.