تاند (جمعه، د سلواغې/ دلوې ۲۴ مه) د یوې نوې علمي څېړنې پایلې ښيي چې هره ورځ د کافي یا قهوې څښلو عادت په نارینهوو کې د پروسټېټ سرطان خطر کمولی شي.
د چین د طبي پوهنتون د شېنجینګ روغتون څېړونکو د کافي د استعمال او د پروسټېټ سرطان د خطر ترمنځ اړیکه څېړلې ده.
څېړونکي وایي، پروسټېټ سرطان په نارینهوو کې د سرطان له امله د مړینې درېیم لوی لامل دی، او اټکل کېږي چې تر ۸۵ کلنۍ پورې به له هر شپږو نارینهوو څخه یو په دې ناروغۍ اخته شي.
په دې څېړنه کې د ۱۶ بېلابېلو مطالعاتو معلومات شامل وو، چې پکې له ۵۷ زرو څخه ډېر د پروسټېټ سرطان ناروغان او په ټوله کې له یو میلیون څخه زیات کسان شامل وو.
د څېړنې د پایلو له مخې، هغه نارینه چې په زیاته اندازه کافي څښي، په هغوی کې د پروسټېټ سرطان خطر په څرګند ډول کم لیدل شوی دی.
څېړنه دا هم ښيي چې د کافي له هرې اضافي ورځنۍ پیالې سره د دې ناروغۍ خطر نور هم کمېږي.
د څېړونکو په وینا، په کافي کې موجود کافین نه یوازې د دماغي فعالیت د ښه کېدو سبب کېږي، بلکې پر بدن نور مثبت اغېزونه هم لرلای شي.
تر دې وړاندې په ګڼو څېړنو کې د کافي څښلو او د ځیګر، سینې، کولمو او د سر او غاړې د سرطانونو د خطر د کمېدو ترمنځ ارتباط لیدل شوی و.
خو څېړونکو ټینګار کړی چې دا یوه مشاهداتي څېړنه ده او په بشپړه توګه دا نه شي ثابتولای چې کافي په مستقیم ډول د سرطان مخنیوی کوي که نه، او په دې برخه کې لا زیاتو څېړنو ته اړتیا ده.