تاند ( سه شنبه د سلواغې ـ دلوې ۲۱مه) د طالبانو د حکومت د رئیس الوزرا د اقتصادي مرستیال ملا عبدالغني برادر اخند په مشرۍ د اقتصادي کمېسیون په نننۍ غونډه کې د کبانو روزلو د پراختیا طرحه او د کرنې او مالدارۍ سکټور د پراختیا ملي پالیسي تائید شوه.
اقتصادي معاونیت په یوه خبرپاڼه کې د دغه تائیدۍ خبر خپور کړی دی.
ملابرادر ویلي چې، د ماهیانو روزلو د پراختیا د طرحې عملي کولو له مخې به په ټول هیواد کې ۷ زره او ۷۰۰ لوی، منځني او کوچني د ماهیانو روزلو فارمونه جوړ شي.
د خبرپاڼې له مخې به په دغو فارمونو کې کابو ۳۰۰ زره کسانو ته به په مستقیم او غیر مستقیم ډول د کار زمینه هم برابره شي.
په خبرپاڼه کې راغلي چې، د تائید شوې پالیسۍ له مخې به د هیواد د اوبو لګولو کرنیز سیسټمونه میکانیزه، مدیریت او د افغانستان کرنه میکانیزه شي.
خبرپاڼه زیاتوي چې، یاده طرحه او پالیسي د وروستۍ پرېکړې په خاطر د طالبانو د مشرتابه دفتر ته استول شوې ده.