تاند (یکشنبه، د سلواغې/ دلوې ۱۹ مه) د ترکیې رسنیو د شنبې په ورځ راپور ورکړ چې د دغه هیواد د ساکاریا ښار پولیسو ۱۹ افغان کډوال، چې په یوه کانتینر کې پټ شوي وو، نیولي او د قانوني بهیر تر بشپړېدو وروسته یې له هېواده ایستلي دي.
د بینګول ښار پولیسو هم د انساني قاچاق پر ضد د عملیاتو په ترڅ کې د ۱۲ افغان کډوالو د نیولو خبر ورکړی دی.
د ترکیې پولیس وايي، د روان میلادي کال په لومړۍ میاشت کې تر ټولو ډېر افغان پناه غوښتونګکي نیولي دي.
د راپور له مخې، د دې هېواد د پولیسو ځواکونو په ساکاریا او بینګول ښارونو په عملیاتو کې ۳۲ بېاسناده کډوال، چې یو پاکستانی هم پکې شامل و، پېژندلي او نیولي دي.
د راپورونو له مخې، په ساکاریا کې نیول شوي ۲۰ کډوال د قانوني پړاوونو تر تېرېدو وروسته له ترکیې ایستل شوي او ۱۲ نور کډوال به د بهرنیو وګړو د ایستلو مرکزونو ته ولېږدول شي.
د دغو عملیاتو په تړاو، د انسانيقاچاق په تور د شپږو مشکوکو کسانو لپاره دوسیې پرانیستل شوي او پر هغوی اداري جریمې هم لګېدلې دي.
په ترکیه کې د افغان کډوالو د نیولو او ایستلو لړۍ لا هم په بېلابېلو ښارونو کې روانه ده.
د ترکیې د کډوالۍ ادارې په وېبپاڼه کې راغلي چې د روان میلادي کال په لومړۍ میاشت کې په ټول هېواد کې درې زره او ۵۳ افغان کډوال پېژندل شوي او نیول شوي دي.