تاند (جمعه، د سلواغې/ دلوې ۱۷ مه) د افغانستان له پېښو سره د مبارزې ادارې د جمعې په ورځ وویل، چې په تېرو ۲۴ ساعتونو کې د واورې د اورېدو او سېلونو له امله لږ تر لږه پنځه تنه مړه او درې نور ټپیان شوي دي.
د دې ادارې د معلوماتو له مخې، په هرات، فراه، غور او نورستان ولایتونو کې واورې او سېلونو مرګژوبله او مالي زیانونه اړولي دي.
له طبیعي پېښو سره د مبارزې ادارې ویاند، محمدیوسف حماد، رسنیو ته په یوه پیغام کې ویلي چې په همدې موده کې شاوخوا لس کورونه د باران او سېلونو له امله په بشپړ ډول ویجاړ شوي سا زیانمن شوي دي.
هممهاله، یادې ادارې په یوه خبرتیا کې د افغانستان د مرکزي غرونو په لمنو کې د راتلونکې اوونۍ د سختو ورښتونو خبرداری ورکړی دی.
د افغانستان د هوا پېژندنې ادارې د پنجشنبې په ورځ ویلي و چې د هیواد په ۲۰ شمالي او مرکزي ولایتونو کې د باران، توپان او تېزو بادونو احتمال شته.
د پېښو پر وړاندې د مبارزې ادارې د دلوې په څلورمه هم اعلان کړی و چې په یو شمېر ولایتونو کې د واورې او باران له امله ۶۱ کسان مړه شوي او ۱۱۰ نور ټپیان شوي دي.