تاند (چهارشنبه د سلواغې ـ دلوې ۱۵مه) د طالبانو د ټرانسپورټ او هوايي چلند وزارت اړوند د هوا پېژندنې ادارې سبا پنج شنبه د سالنګونو په ګډون په ۲۳ ولایتونو کې د بارانونو او واورې ورېدلو اټکل کړی دی.
دغه وزارت په یوه خبرپاڼه کې کندهار، هلمند، نیمروز، فراه، هرات، کندز، غور، بادغیس، فاریاب، سرپل، جوزجان، سمنګان، بلخ، بغلان، پروان، لوګر، پکتیا، پکتیکا، غزنی، زابل، میدان وردګ، بامیان او دایکندي ولایتونه یاد کړي دي.
په اټکل کې له ۱۰ څخه تر ۴۵ ملي مترو د باران او له ۱۰ څخه تر ۴۵ سانتي مترو د واورې ورېدلو اټکل شوی دی.
دا اټکل داسې مهال اعلانېږي چې، په تېرو واورو او ورښتونو کې خلک له مالي او ځاني زیانونو سره مخ شوي او لا هم زیانمن خلک سختو مرستو ته اړتیا لري.