تاند (سې شنبه، د سلواغې/ دلوې ۱۴ مه) لوړ قد عموماً د ښکلا او اعتماد نښه بلل کېږي، آو هر څوک غواړي چې لوړه ونه ولري خو طبي څېړنو ښودلې ده چې لوړ قد کېدای شي د ځينو ځانګړو روغتيايي ستونزو سبب هم شي۔
د متخصصانو په وينا، جګ کسان د زړه، بندونو او د ملا د تېر له ستونزو سره تر نورو زيات مخ کېدای شي، خو د روغ ژوندانه یا د صحي اصولو د رعایتولو له لارې دا خطرونه کمېدای شي.
د لوړو کسانو ۵ عامې روغتيايي ستونزې:
۱. پر زړه او د وينې پر رګونو زيات فشار
د متخصصانو په وينا، د لوړ قد له امله د وينې رګونه هم اوږده وي، چې له کبله يې زړه بايد د وينې د پمپ کولو لپاره زيات کار وکړي.
دا حالت د زړه د ضربان د ګډوډۍ او د وينې د ټوټو د جوړېدو خطر زياتوي.
۲. د بندونو او ملا ستونزې
لوړ قد او وزن د زنګنونو، کولمو او د ملا پر تېر زيات فشار راولي۔ د وخت په تېرېدو سره دا فشار د بندونو درد، او د ملا د مزمن درد سبب کېږي.
۳. د ساه اخيستلو ستونزې
که څه هم جګو کسانو سږي لوی وي، خو ناسمه ناسته او کوږ ګرځېدل د ساه اخيستلو وړتيا اغېزمنولای شي۔ همداراز د ملا د تېر ستونزې هم د ساه لنډۍ لامل کېدای شي۔
۴. په لوبو کې د ټپي کېدو زيات خطر
اوږده لاسونه او پښې د لوبو پر مهال پر عضلو او ليګامنټونو زيات فشار راولي۔ ناڅاپي تاوېدل يا ټوپ وهل د زنګون او پښو د بندونو د ټپي کېدو امکان زياتوي۔
۵. د ملا د تېر د ډسک خرابېدل
د ملا پر اوږده تیر فشار زيات وي، په ځانګړي ډول د اوږدې مودې ناستې او د کمزورې بدني جوړښت له امله۔ دا حالت د ډسک د خرابېدو او د دايمي ملا درد خطر زياتوي۔
طبي متخصصان وايي چې قد پخپله د ناروغۍ نه سبب کېږي، بلکې اصلي رول د ژوند طرز، ورزش، سمه ناسته او متوازنه غذا لوبوي۔
که جګ کسان خپلې بدني روغتيا ته پاملرنه وکړي، نو تر ډېره بريده له دغو ستونزو څخه ځان ساتلی شي.