تاند (دوشنبه، د سلواغې/ دلوې ۱۳ مه) ساینسپوهانو د مصنوعي ځیرکتیا (AI) ټکنالوژۍ په مرسته یو نوی ویروس جوړ کړی دی، چې Evo–Φ2147 نومول شوی دی. د څېړونکو په وینا، دا پرمختګ په لابراتوار کې د ژوند د تخلیق په برخه کې یو مهم پړاو بلل کېږي۔
دا ویروس یوازې له ۱۱ جینونو جوړ دی او د ژوند تر ټولو ساده بڼه ګڼل کېږي، حال دا چې د انسان په جینوم کې نژدې ۲۰۰ زره جینونه موجود دي. دا ویروس په ځانګړي ډول د E. Coli بکتریاو د له منځه وړلو لپاره جوړ شوی دی۔
د څېړنې پر مهال د Evo2 په نوم د AI وسیلې په مرسته ۲۸۵ نوي ویروسونه جوړ شول، چې له دې ډلې ۱۶ یې تر ټولو اغېزمن ثابت شول. تر ټولو بریالی ویروس د طبیعي ډولونو پرتله ۲۵ سلنه ډېر چټک و۔
خو کارپوهانو خبرداری ورکړی چې د AI له لارې جوړ شوي داسې ویروسونه په راتلونکي کې احتمالي خطرونه هم زېږولای شي، له همدې امله د احتیاطي تدابیرو خپلول اړین دي.
تر دې پخوا په ۲۰۲۰ کال کې د کورونا یا کووید ۱۹ د ویروس په اړه هم شکونه څرګند شوي وو چې ممکن په کوم لابراتوار کې په لوس لاس جوړ شوي وي.
د جوړو شویو ویروسونو په اړه تازه څېړنه د برېتانیايي ساینسپوه ډاکټر اېډریان وولفسن په مشرۍ د «جینیرو» په نوم سټارټاپ کړې ده. د ډاکټر وولفسن په وینا، اوس د طبیعي ارتقا تر څنګ د AI پر بنسټ د جینوم ډیزاین هم د ژوند د ارتقایي بهیر برخه ګرځي، چې د ساینس په نړۍ کې د یو نوي انقلاب زېری ورکوي.