تاند (سې شنبه، د سلواغې/ دلوې ۷ مه) د امریکا حکومت د هغه سړي د خوشې کېدو لپاره خبرې اترې کوي چې د کولوراډو ایالت اوسېدونکی دی او له تېر یوه کال راهیسې په افغانستان کې د طالبانو له خوا بندي دی.
د امریکايي ورځپاڼې کېمرا د راپور له مخې، ۶۴ کلن ډینس کوایل، چې د پویبلو ښار اوسېدونکی دی، د ۲۰۲۵ کال د جنورۍ په ۲۷مه نېټه د خپل کار ځای ته نژدې د طالبانو د استخباراتو د عمومي ریاست له خوا ونیول شو. د کوایل کورنۍ وایي، هغه د یوې علمي څېړنې په چوکاټ کې د افغاني ټولنو د ژبو د ملاتړ لپاره کار کاوه. کورنۍ یې دا معلومات په یوې ویبپاڼه کې خپاره کړي چې د هغه د خوشې کېدو لپاره کمپاین کوي.
د کوایل درې خویندو او ۸۳ کلنې مور نهه میاشتې له هغه سره هېڅ اړیکه نه لرله، تر هغه چې وروسته پوه شول ژوندی دی. د هغه خور، مولي لانګ، د همدې میاشتې په پیل کې نیوز نېشن ته وویل چې کوایل په نژدې بشپړ یوازېتوب کې، د یوې زېرخانې (بیسمنټ) په څېر ځای کې ساتل کېږي. د کورنۍ په وینا، هغه ته طبي خدمات نه شته او حتی تشناب ته د تلو لپاره هم اجازې ته اړتیا لري.
لانګ نیوز نېشن ته وویل:
«هر ځل چې د هغه زنګ راځي، موږ د هغه د خلاصون په اړه لا نهیلي کېږو.»
خو طالب چارواکو سيبيایس نیوز ته ویلي چې د کوایل روغتیايي حالت ښه دی او د «بند د حقونو درناوی یې کېږي». هغوی دا هم ویلي چې د هغه د قضیې رسمي محاکمه به «ژر» پیل شي.
د نیویارک ټایمز ورځپاڼې د دوشنبې د راپور له مخې، د ټرمپ اداره او د افغانستان حکومت له څو میاشتو راهیسې په پټه د کوایل په ګډون د امریکايي بندیانو د خوشې کېدو په اړه خبرې کوي. خو سرچینو ورځپاڼې ته ویلي چې خبرې درېدلې دي، ځکه افغان چارواکي ټینګار کوي چې د هر ډول تړون په بدل کې باید امریکا د ګوانتانامو له زندانه وروستی پاتې افغان بندي هم خوشې کړي.
ولسمشر ډونالډ ټرمپ، چې تېره اوونۍ ترې د کوایل د وضعیت په اړه پوښتنه وشوه، وویل چې هغه ډېر معلومات نه لري، خو دا یې هم وویل چې په دې اړه به «ډېر کلک دریځ» غوره کړي.
د امریکا د بهرنیو چارو وزارت سيبيایس نیوز ته په یوه بیان کې وویل:
«طالبان باید سمدستي ډینس کوایل او ټول هغه امریکایان خوشې کړي چې په افغانستان کې بندي دي، او د یرغمل نیونې د ډیپلوماسۍ تګلاره پای ته ورسوي. موږ ټولو امریکایانو ته یادونه کوو: افغانستان ته سفر مه کوئ. طالبانو کلونه کلونه امریکایان نیولي دي او د امریکا حکومت ستاسو خوندیتوب نه شي تضمینولی.»
کوایل د ۲۰۰۰مې لسیزې په پیل کې لومړی ځل افغانستان ته تللی و او هلته یې په قانوني ډول کار کاوه، څو «د افغانستان بډایه ژبنۍ تنوع وڅېړي او له افغان ټولنو سره مرسته وکړي چې په خپلو ژبو سرچینې رامنځته کړي»، د هغه کورنۍ وایي. دا د کولوراډو اوسېدونکی په کابل کې اوسېده او له ځایي خلکو سره یې پیاوړې او دوامدارې اړیکې جوړې کړې وې.
د هغه کورنۍ لیکلي:
«ډینس تل د زړه له کومي د افغاني کلتور صادقانه هرکلی کړی — د دودیز (افغاني) شین چای یې څښه، وچې مېوې به یې خوړلې، او له زړه به یې داسی خبرې کولې چې کلتورونه سره نښلوي. له افغان ولس سره د هغه مینه یوازې مسلکي نه وه؛ شخصي او له زړه وه.»