تاند (سې شنبه، د سلواغې/ دلوې ۷ مه) د خیبرپښتونخوا د صوابي د شاه منصور په باچاخان طبي کمپلېکس کې په یو وخت زېږېدلي پنځه ماشومان په پنځمه ورځ وفات شول.
د خیبرپښتونخوا رسنیو پرون (دوشنبې) راپور ورکړ چې په زېږېدلو ماشومانو کې یو هلک او څلور نجونې شاملې وې. د معلوماتو له مخې د ماشومانو پلار محمد نوید د نصیر محمد زوی دی او د صوابۍ د زیاتو سیمې د منصورخېل محلې اوسېدونکی دی.
د روغتون ادارې ویلي چې ټول پنځه ماشومان له وخته مخکې زېږېدلي وو او له هغو څخه څلور ماشومان د روغتون د نوزېږو ځانګړې څانګې (NICU) ته داخل کړل شوي وو، چې هلته ورته عصري طبي اسانتیاوې برابرې شوې وې.
د روغتون د ادارې په وینا، د ماشومانو زېږون او ورپسې درملنه د صحت کارډ تر چتر لاندې په بشپړ ډول وړیا ترسره شوې وه.
طبي کارپوهانو ویلي چې له وخت څخه مخکې زېږېدو او د کمزورۍ له امله د ماشومانو حالت ډېر نازک و، له همدې امله هغوی ژوندیي پاتې نه شول او وفات شول.