تاند (چهارشنبه، د مرغومي/ جدې ۲۴ مه) په متحده عربي اماراتو کې سږ کال د ملي مسافر وړونکي رېلګاډي شبکه پیل کېږي، چې د دې هیواد ۷ واړه امارتونه له یو بل سړه نښلي.
دا شبکه به د متحده عربي اماراتو په ۷ امارتونو کې ۱۱ ښارونه او سیمې له یو بل سره ونښلوي.
د «الاتحاد ریل» د رېلګاډي خدمت به ابوظهبي، دوبۍ، شارجه او فجیره سره وتړي او همداراز به د ابوظهبي د لوېدیځې سیمې له الظفره څخه د شارجې تر لرې دښتو پورې د تګ راتګ اسانتیا برابره کړي.
د اتحاد ریل چارواکو ویلي چې دا رېلي خدمات به په عصري اسانتیاوو سمبال وي، چې پکې وایفای انټرنټ، او د موبایل چارج کولو اسانتیا شامله ده، او هر رېلګاډی به د ۴۰۰ مسافرو د لېږد وړتیا ولري.
دا ملي رېل پټلۍ په متحده عربي اماراتو کې د مسافرو د سفر د چټکتیا، هوساینې او خوندیتوب لپاره یو مهم ګام بلل کېږي، او د هېواد ښاري او کلیوالي سیمې به له عصري ترانسپورتي شبکې سره ونښلوي.
اماراتي چارواکو د دې پروژې یو بل مهم هدف د هوا د ککړتیا له کمېدو سره مرسته بللې ده.
دا پروژه به وروسته همداراز عمان هیواد او د خلیج نورو عربي هیوادونو ته هم وغځول شي.