تاند (شنبه، د مرغومي/ جدې ۲۰ مه) نژدې پنځه کاله وروسته له هغه چې طالبانو کابل ونیوه، د طالبانو له لوري ټاکل شوی لومړنی ډیپلومات هند ته رسېدلی، څو په نوي ډیلي کې د افغانستان د سفارت مشري پر غاړه واخلي.
دا خبره سرچینو «دي هندو» ورځپاڼې ته تایید کړې ده.
سرچینې وایي، مفتي نور احمد نور، چې د طالبانو د بهرنیو چارو وزارت یو جګپوړی چارواکی دی، ډیلي ته رسېدلی او تمه ده چې د سفارت د سرپرست (شارژدافېر) په توګه دنده پیل کړي.
دا پرېکړه د هند او د طالبانو د حکومت ترمنځ د ۲۰۲۵ کال په اکتوبر کې ډیلي ته د طالبانو د بهرنیو چارو وزیر امیر خان متقي د سفر په لړ کې شوې وه، هغه سفر چې د هند د بهرنیو چارو وزیر اېس جې شنکر یې کوربه و.
مفتي نور د هند په رسمي یو اوونیز سفر کې له امیر خان متقي سره ملګری و. هغه له متقي سره د دیوبند دارالعلوم لیدو ته هم تللی و.
همداراز، نوموړي د ۲۰۲۵ کال د ډسمبر په وروستیو کې ډاکې ته سفر وکړ او ویل کېږي چې هلته یې له یو شمېر اسلامي مشرانو سره لیدلي دي. بنګلهدېشي رسنیو دا سفر مهم بللی، ځکه دا د فبرورۍ له ۱۲مې نېټې څخه لږ مخکې ترسره شوی و.
سرچینې زیاتوي چې مفتي نور، چې په کابل کې د افغانستان د بهرنیو چارو وزارت د لومړۍ سیاسي څانګې عمومي رئیس دی، تر اوسه د ګومارل کېدو رسمي لیک نه دي سپارلي او د طالبانو د بهرنیو چارو وزارت هم د هغه ګومارنه په رسمي ډول نه ده اعلان کړې.
تر دې وړاندې، د ۲۰۲۳ کال په اپرېل کې طالبانو هڅه کړې وه چې په ډیلي کې یو بل کس د سرپرست سفیر په توګه وټاکي، خو د سفارت کارکوونکو هغه ونه مانه او سفارت ته یې د هغه د ننوتلو مخه ونیوله. وروسته بیا طالبان وتوانېدل چې خپل استازی د ممبۍ په قونسلګرۍ کې وټاکي چې نوم یې اکرامالدین کامل و.
په همدې مهال، د حیدراباد قونسل، محمد ابراهیمخېل، چې د پخواني جمهوري حکومت له لوري ټاکل شوی و، په ډیلي کې د سرپرست سفیر دنده پر غاړه واخیسته. سرچینې وایي، لا څرګنده نه ده چې ابراهیمخېل به بېرته حیدراباد ته ستنېږي که نه، ځکه هلته قونسلګري هم تازه د طالبانو بل استازي، حبیبالرحمن آفتاب، ته سپارل شوې ده.
ځايي چارواکو «دي هندو» ته ویلي چې هغوی ته تر اوسه د قونسلګرۍ د کارکوونکو د بدلون په اړه رسمي خبر نه دی ورکړل شوی. دا مهال د ممبۍ او حیدراباد دواړو قونسلان د مفتي نور د راتګ په تړاو ډیلي ته تللي دي.