تاند – نوې څېړنه ښيي چې مصنوعي ځیرکتیا د زړه د ناروغیو لپاره د درملو تجویز ممکن په بنسټیز ډول بدل کړي.
د یوې نوې مطالعې له مخې، د مصنوعي ځیرکتیا یوه نوې وسیله کولی شي د زړه د ناروغیو لپاره د درملنې د موندلو بهیر چټک کړي.
د زړه او رګونو ناروغۍ (CVD) د اروپايي ټولنې په کچه د مړینې او معلولیت تر ټولو لوی لامل بلل کېږي. د اقتصادي همکارۍ او پراختیا د سازمان (OECD) د معلوماتو له مخې، دا ناروغۍ هر کال د شاوخوا ۱.۷ میلیونه کسانو د مړینې سبب کېږي او نژدې ۶۲ میلیون کسان اغېزمنوي.
د لندن د امپریال کالج ساینسپوهانو د مصنوعي ځیرکتیا یوه وسیله جوړه کړې، څو وپېژني چې کوم جینونه له ناروغیو سره تړاو لري او له لویو طبی معلوماتي بانکونو سره د زړه د دقیقو سکنونو په یوځای کولو د زړه د ناروغیو لپاره د درملو موندل ګړندي کولی شي.
دا وسیله چې CardioKG نومېږي، د بریتانیا د بایوبانک د زرګونو کسانو د زړه د تصویرونو د معلوماتو پر بنسټ جوړه شوې ده.
په دې معلوماتي ټولګه کې د هغو ناروغانو معلومات شامل وو چې د دهلېزي فبریلاسیون، د زړه د کمزورتیا او د زړه د حملې په څېر ناروغۍ لري، او همدارنګه د سالمو رضاکارانو معلومات هم پکې وو.
څېړونکي وايي چې د دې طریقې په وسیله کېدای شي په ډېر دقت سره اټکل وشي چې کوم درمل د ځانګړو قلبي ناروغیو لرونکو کسانو لپاره ګټور دي.
د امپریال کالج لندن د MRC طبي علومو لابراتوار د زړه د محاسبې د تصویري ډلې مشر، ډکلن اوریګن وویل:
«د علمي ګرافونو یوه ګټه دا ده چې د جینونو، درملو او ناروغیو اړوند معلومات سره یوځای کوي.»
څېړونکي وايي دا تګلاره په پایله کې کولی شي داسې شخصي شوې روغتیايي پاملرنه رامنځته کړي چې پکې درملنې د هر انسان د زړه له فعالیت سره لا نژدې برابرې وي.
دا ټکنالوژي د نورو ناروغیو د څېړنې لپاره هم د طبي تصویرونو د معلوماتو پر بنسټ کارېدلی شي، لکه د مغزو اختلالات او چاغښت.
اوریګن وویل:
«دا معنا لري چې تاسو د نوو درملنو د موندلو ډېر ځواک ترلاسه کوئ. موږ وموندله چې په ګراف کې د زړه د تصویرونو د معلوماتو شاملول، دا بدل کړل چې څنګه او تر کومه حده نوي جینونه او درمل پېژندل کېږي.»
د یادو شوو مهمو درملو له ډلې څخه، متوترکسات یاد شوی چې په پراخه کچه د روماتویید ارتریت د درملنې لپاره کارول کېږي، او همدارنګه د شکر ناروغۍ د درملو یوه ډله چې ګلیپتینونه بلل کېږي.
د مصنوعي ځیرکتیا ماډل وړاندیز کړی چې متوترکسات ښايي د زړه د کمزورتیا یا نقیصې لرونکو کسانو لپاره ګټور وي، او ګلیپتینونه ممکن د دهلېزي فایبریلاسیون ناروغانو ته ګټه ورسوي.
شننې همداراز په ځینو د دهلېزي فبریلاسیون ناروغانو کې د کافین د احتمالي محافظتي اغېز یادونه کړې، خو څېړونکو ټینګار کړی چې دا په دې معنا نه ده چې خلک باید د کافین مصرف بدل کړي.
د دې مطالعې لومړی لیکوال او د امپریال کالج لندن د معلوماتي ساینس څېړونکی خالد رجوب وویل:
«د دې کار پر بنسټ به موږ د پوهې ګراف یو داسې متحرک او ناروغمحوره چوکاټ ته پراخ کړو چې د ناروغۍ واقعي لارې ثبت کړي.»
هغه زیاته کړه:
«دا به د شخصي شوې درملنې او د ناروغیو د احتمالي رامنځته کېدو د وخت د وړاندوینې لپاره نوې لارې پرانیزي.»