تاند ( پنج شنبه د مرغومي ـ جدي ۱۱مه) د طالبانو د حکومت د کډوالو چارو وزارت خبر ورکړی، چې د پاکستان له زندانونو ۳۴۵ افغان کډوال ازاد او هېواد ته راستانه شول.
یاد وزارت زیاته کړې، دغه کډوال د سپین بولدک له لارې پرون چهارشنبه هېواد ته راستانه شوي دي.
د کډوالو وزارت زیاته کړې، چې یاد کسان د پاکستان په مختلفو سیمو کې نیول شوي وو او له یوې تر دوو میاشتو پورې بندیان و.
د سرچینې په معلوماتو کې راغلي چې، یادو راستانه شوو سره د ثبت له پروسې وروسته اړینه مرسته شوې او خپلو سیمو ته لېږدول شوي دي.
د یادونې وړ ده چې، پاکستان له افغان کډوالو سره تر بل هر وخت بد چلند ته دوام ورکوي او هره ورځ په زرګونه افغان کډوال په جبري ډول وباسي.