تاند (جمعه، د مرغومي/ جدي 5 مه) ایراني پولیسو د خپلو امنیتي سرچینو په قول د افغانستان د تخار ولایت د پولیسو د پخواني امنیه قومندان، اکرامالدین سریع، د وژل کېدو پخلی کړی دی.
نوموړی په تهران ښار کې د وسلهوال برید په ترڅ کې په ډزو وژل شوی دی.
د رسنیو د راپورونو له مخې، اکرامالدین سریع چې د افغانستان د پخواني حکومت یو امنیتي چارواکی و، د تهران په ولیعصر واټ کې له خپل کاري ځایه تر وتلو وروسته په نښه شو. هغه پر سر ټپي شوی و، روغتون ته ولېږدول شو، خو وروسته یې د ټپونو له امله ساه ورکړه.
ایراني چارواکو تر اوسه د دې برید د انګېزې او یا د بریدګرو په اړه څه نه دي ویلي.
اکرامالدین سریع د طالبانو یو سرسخت مخالف بلل کېده او د افغانستان د پخواني حکومت تر ړنګېدو وروسته هم د هغوی پر ضد په څرګندونو کې فعال پاتې شوی و. نوموړي په ایران کې د افغانستان د پخوانیو امنیتي ځواکونو له غړو سره نژدې اړیکې لرلې او د هغو پخوانیو پوځیانو د حقونو لپاره یې هڅې کولې چې ډېری یې اوس په ایران کې اوسي.
دا په ایران کې د طالبانو دوهم پخوانی مخالف پوځي قومندان دی چې وژل کېږي.
تر دې وړاندې، په سپتمبر میاشت کې، معروف غلامي—چې د طالبانو مخالف مشر اسماعیل خان ته نژدې پوځي څېره وه—په مشهد ښار کې په خپل دفتر کې په ډزو وژل شوی و.
په همدې حال کې د پاسوال سریع د وژل کېدو په اړه ویل کېږي چې نوموړی د تخار د یوه پخواني غیرمسوول قوماندان ملک تاتار له لوري څو ځلې په مرګ ګواښل شوی و.
د جمعیت ګوند ځینو سرچینو هم ادعا کړې چې پاسوال سریع د قوماندان تاتار له لوري وژل شوی دی.