تاند ( چهارشنبه د مرغومي ـ جدي ۳مه) پاکستاني رسنیو راپور ورکړی چې بلوچستان کې د امنیتي ځواکونو د معلوماتو له مخې، د چاغي ولسوالۍ د نوکنډي او تفتان سیمو کې د استخباراتي عملیاتو پر مهال ۱۷۹ افغان وګړي نیول شوي دي.
سرچینې ویلي چې، دغه افغانان له قانوني اسنادو پرته د کمې کارېدونکې لارې پاکستان ته ننوتي دي.
بل لور ته، تېره اونۍ په نوکنډي کې د ټرافیکي پېښې له امله ۱۱ افغانان مړه او ۹ نور ټپیان دي.
په دې وروستیو کې په ناقانونه لارو بهرنیو هېوادونو ته د افغانانو ورتګ زیات شوی چې، لوی لامل یې په هېواد کې بېکاري او د ځوانانو پر وړاندې د طالبانو سخت محدودیتونه یادېږي.
د نظر خاوندان وایي، د حاکمو نظامونو لومړنۍ دنده د ځوانانو پالل او دوی ته د دندې د موندلو د زمینو برابرول دي خو برعکس افغانستان کې ځوانان ځپل کيږي او په یو ډول سختو پرېکړو ته هڅول کېږي.