تاند ( سه شنبه د مرغومي ـ جدي ۲مه) د طالبانو د حکومت د ټرانسپورټ او هوايي چلند وزارت خبر ورکړی، چې د روان کال په وروستیو درېیو میاشتو کې یې، د هېواد بېلا بېلو ولایتونو کې د ۳۵ زره ۲۸۷ مسافر وړونکو او بار وړونکو موټرو تخنیکي ارزونه کړې ده.
یاد وزارت لیکلي، د دغه ارزونې په ترڅ کې د لېږدونکو وسایطو تخنیکي وضعیت بېلابېل اړخونه په منظم ډول ارزول کېږي.
سرچینه زیاتوي چې دغه ارزونه د دې لپاره کېږي، څو د مسافرو، سوداګریزو مالونو او لېږدوونکو وسایطو د خوندیتوب بشپړ تامین رامنځ ته او د هر ډول احتمالي خطر، ټرافیکي پېښو او مالي او ځاني زیانونو مخه ونیول شي.
تر دې وړاندې افغان چارواکو ویلي، هېواد کې د ټرانسپورټي سیستم معیاري کولو ته ژمن دي او دې برخه کې د مسؤلینو له لوري هڅې دوام لري.
دا هڅې داسې مهال دوام مومي چې، په هېواد کې په ځانګړي ډول پر لویو لارو د ترافیکي پېښو زیاتوالي خلک اندېښمن کړي دي.
هره ورځ د هېواد له ولایتونو د ترافیکي پېښو او په کې د اوښتې مرګ ژوبلې راپورونه ورکول کېږي.