تاند ( سه شنبه د مرغومي ـ جدي ۲مه) د طالبانو د حکومت د امر بالمعروف، نهې عن المنکر او شکایتونو اورېدلو وزارت خبر ورکړی، چې د دې وزارت محتسبینو تېرو درېیو میاشتو کې په ټول هېواد کې ۵ زره او ۷۸۱ رواني ناروغان راټول کړي دي.
یاد وزارت لیکلي، دغه کسان د درملنې په موخه د سرې میاشتې ټولنې ته ورپېژندل شوي.
د دې وزارت ویاند وايي، دا اقدام د یوې سالمې ټولنې رامنځته کېدو او لېونیانو سره د مرستې په موخه شوی دی.
روانپوهان وایي، په افغانستان کې د رواني ناروغیو کچه ډېره لوړه او د دوی په وینا په هرو سلو تنو کې ښایي لس سلنه روغ وي نور ټول رواني ستونزې لري.
روانپوهان د دې ناروغۍ د زیاتوالي لوی لاملونه ټولنیز محدودیتونه،ناسم دودونه، اقتصادي ستونزې، د زده کړو کموالی او په یو شمېر ځوانانو کې لوړې هیلې چې دوی ورته نشي رسېدای یاد کړي دي.
پوهان وایي که د بېکارۍ کچه کمه او پورتني محدودیتونه راکم کړای شي ښایي د رواني ناروغانو راټولولو ته اړتیا نه وي او دوی به خپله ورغېږي.