تاند (یکشنبه) د لیندۍ/ قوس ۳۰ مه) د هند په آسام ایالت کې یوه مسافر وړونکې رېلګاډی د پیلانو له یوې رمې سره ټکر شوی، چې په پایله کې یې اووه پیلان/ هاتيان وژل شوي او یو ټپي شوی دی.
د ځایي چارواکو په وینا، دا پېښه تېره شپه (چې سبا یې شنبه وه) رامنځته شوې او له امله یې د رېلګاډي پنځه واګونونه یا ډبې هم له پټلۍ واوښتې، خو د کوم مسافر د ټپي کېدو راپور نه دی ورکړل شوی.
پولیس وایي، د رېلګاډي چلوونکی د پیلانو په لیدو په بیړه سمدستي بریک ونیوه، خو رېلګاډی ونه توانېد چې پر وخت ودریږي. یاد اورګاډی د هند له میزورام ایالت څخه نوي ډیلي ته روان و.
د یوه نړیوال خبري اژانس د راپور له مخې، په هند کې له شاوخوا ۲۲ زره وحشي پیلانو څخه تر ۴ زره زیات په اسام کې دي.
چارواکي وایي، د پیلانو د تګ راتګ لپاره په ځانګړو دهلیزونو کې د رېلګاډو پر چټکتیا محدودیتونه لګېدلي، خو دا پېښه له هغو ټاکل شویو سیمو څخه بهر رامنځته شوې ده.