تاند (جمعه، د لیندۍ/ قوس ۲۸ مه) یوه زلزله چې شدت یې د ریښتر په حساب ۵ اعشاریه ۷ درجې و، نن د افغانستان شمال ختیځې سیمې ولړزولې.
د زلزله پېژندنې ویبپاڼې، والکانو دیسکوري د دې زلزلې مرکز د بغلان ولایت د نهرین ولسوالۍ د شمال ختیځ په ۲۴ کیلومترۍ کې بللی او ویلي چې دا زلزله د افغانستان تر غرمې مخکې په یوولس بجې او څلور دقیقې وشوه.
د جرمني د زلزله پېژندنې ادارې د دې زلزلې شدت ۵ اعشاریه ۷ ریښتره بللی او د هغې مرکز یې تر مځکې ۱۰ کیلومتره لاندې اعلان کړی دی.
دې ته په کتو چې د زلزلې مرکز ډېر ژور نه دی، دا زلزله خطرناکه ګڼل کېږي.
تر دې دمه د احتملي مرکګ ژوبل او تاوانونو په اړه کوم راپور نه دی ورکړل شوی.
د ۲۰۰۲ م کال په مارچ میاشت کې هم په نهرین کې یوه سخته زلزله شوې وه چې شدت یې د ریښتر په کچه ۶ اعشاریه ۵ درجې و. په دې زلزله کې ۱۱۰۰ تنه مړه او تر ۱۰ زره ډیر خلک بې کوره شول.
تېره میاشت د افغانستان په شمالي ولایتونو لکه بلخ، سمنګان، کندوز او بغلان کې یوې سختې زلزلې ۲۷ تنه مړه او ۹۵۶ نور ټپیان کړل. دا زلزله د شپې پېښه شوې وه ځکه یې هم مرګ ژوبلې ډېرې واړولې.