تاند (پنج شنبه د لیندۍ – قوس ۲۷مه) د طالبانو د حکومت د برېښنا شرکت اجرایوي مشر د قرغیزستان د انرژۍ وزارت له مرستیال وزیر سره په لیدنه کې د برېښنا وارداتي وضعیت، د پانګونې فرصتونو او د کاسا-1000 پروژې د پرمختګ په اړه خبرې کړې دي.
د یاد شرکت په خبرپاڼه کې راغلي، چې د قرغیزستان د انرژۍ وزارت مرستیال وزیر په یاده ناسته کې د دغه هېواد د اوبو د برېښنا د تولید ظرفیتونه، د برېښنا د تولید نورې سرچینې، د شبکې د عصري کېدو پروسه او د ځیرکو میټرونو سیستم تشریح کړ.
د خبرپاڼې له مخې؛ نوموړي د طالبانو له برېښنا سکتور سره د تخنیکي همکارۍ په برخه کې د لازمې همکارۍ ډاډ ورکړی دی.
قرغیزستاني چارواکي د یاد شرکت پلاوي ته له برېښنا شبکې د نږدې کتنې لپاره رسمي بلنه هم ورکړې ده.
په خبرپاڼه کې راغلي چې، دواړه لورو د برېښنا په برخه کې د تخنیکي اړیکو د پیاوړتیا او د ظرفیت لوړولو پر اړتیا ټینګار کړی دی.