عاصم منیر او ټرمپ غزې ته د پاکستانۍ ځواکونو په استولو خبرې کوي

‏تاند ( چهارشنبه د لیندۍ ـ قوس ۲۶مه) د رویټرز خبري اژانس د راپور له مخې، د پاکستان د پوځ مشر، عاصم منیر به په نږدې اوونیو کې واشنګټن ته سفر وکړي او د امریکا له ولسمشر ډونالډ ټرمپ سره به د غزې د ثبات ځواک پر جوړېدو او د پاکستاني پوځ د احتمالي ګډون په اړه خبرې وکړي.

دا به په تېرو شپږو میاشتو کې د دواړو درېیمه لیدنه وي.

د نظر خاوندان وایي، دا سفر د عاصم منیر لپاره تر ټولو مهمه سیاسي او پوځي ازموینه بلل کېږي.

راپور وایي، واشنګټن پر اسلام آباد فشار راوړي چې د غزې لپاره د ټرمپ شل ماده ییز پلان له مخې، د مسلمانو هېوادونو له پوځونو سره یو ځای د غزې د انتقالي ثبات ځواک برخه شي.

د دې پلان هدف د “جګړه ځپلې غزې” څارنه، بیا رغونه او اقتصادي احیا ده، خو د حماس ډلې د بې وسلې کولو مساله هغه ټکی دی چې، ګڼ هېوادونه یې په ګډون کولو اندېښمن کړي دي.

سیاسي شنونکي باور لري، که پاکستان له دې ماموریت ډډه وکړي، ښايي د ټرمپ ناخوښي را وپاروي؛ هغه څه چې د امریکا له پانګونې او امنیتي مرستو سره د “لېوال پاکستان” لپاره مهم ګڼل کېږي.

د واشنګټن د اټلانټیک شورا څېړونکی مایکل کوګلمن وایي، اسلام آباد هڅه کوي د واشنګټن باور وساتي، خو دا پرېکړه د پاکستان په کور دننه لوړه بیه لري.

پاکستان، چې ظاهراً په مسلمانو اټومي وسلو لرونکو هېوادونو کې راځي، خو د غزې احتمالي ماموریت ښايي د اسلام پالو ګوندونو سخت غبرګون راوپاروي.

بل خوا، عاصم منیر په وروستیو اوونیو کې د یو شمېر اسلامي هېوادونو له پوځي او ملکي مشرانو سره لیدلي، چې شنونکي یې د غزې د ځواک په اړه سلا مشورې بولي.